Вицепремиерот истакна дека тоа што се обиделе да ги намалат сите импути кои дефинираат цена на краен производ во прехранбениот сектор и во енергетиката, веќе ги дава резултатите
Данокот за екстра профит ќе се однесува само за профитот остварен годинава и е поголем од четиригодишниот просек, а со него се очекува да се опфатат неколку илјади компании
Вицепремиерот за економски прашања Фатмир Битиќи денеска најави дека ако е потребно ќе ги замрзнат цените на одредени производи, како и дека ќе креираат мерки за помош на најранливите категории граѓани и по март следната година кога истекуваат постојните.
„Иако се залагам за целосно либерализирана пазарна економија, ако е потребно ќе ги замрзнеме цените бидејќи граѓаните заслужуваат да се однесуваме етички во овие моменти солидарно кон заедничкото справување со кризата“,
рече Битиќи, одговарајќи на новинарско прашање во врска со зголемувањата на цените на храната и на електричната енергија.
Вицепремиерот истакна дека тоа што се обиделе да ги намалат сите импути кои дефинираат цена на краен производ во прехранбениот сектор и во енергетиката, веќе ги дава резултатите.
„Веќе се даваат првите резултати на враќање на одредено ниво на цени на основните прехранбени производи. Лично не сум задоволен од брзината на која реагираат сите, сметам дека можеа солидарно побргу тоа да го направат зашто во криза сите се погодени и сметам дека затоа целосно поддржувам воведување нов данок за екстра добивка бидејќи тоа е еден начин како кон одредени структури треба соодветно да се однесуваме. И наредната година ќе биде период на криза“,
рече Битиќи на прес-конференција во Владата.
Во врска со електричната енергија, тој смета дека успеале да осигураат и да не дозволат зголемувањата да бидат енормни до ниво на пазарни цени.
„Ме радува тоа што ЕСМ гарантира дека следната година производството на струја, не само што ќе биде зголемено, туку ќе се врати во најдобрите години од пред 20 години можеби кога тоа не се случило некогаш во нашата држава и сето тоа во кризна година и затоа мислам дека секое едно поместување на цените и еден отсто некогаш за одредени категории граѓани боли, за најранливите ќе креираме мерки за да им помогнеме да се справат. Активни се мерките што ги воведовме. Ќе продолжиме и од март кога истекуваат, да креираме нови мерки за најмалку да го осетат најранливите категории граѓани евентуалното зголемување на цени“,
додаде Битиќи.
Што се однесува до парите од данокот за екстра профит, Битиќи рече дека парите собрани од него ќе се користат за справување со кризата.
„Не ги добиваме овие пари за што било. Ќе ги користиме за справување со кризата. На крајот на денот можеби ќе ги користиме токму за поддршка на инвестиции на компаниите за да им помогнеме во нивните напори за справување со криза“,
рече Битиќи.
Овој данок, како што појасни, ќе се однесува само за профитот остварен годинава и е поголем од четиригодишниот просек, а со него се очекува да се опфатат неколку илјади компании.
„Компаниите коишто евентуално ќе се опфатат со законот се сите компании кои имаат приход над 10 милиони евра во оваа година и кои имале одреден профит. Моделот е компаниите кои имаат приход над 10 милиони, ако нивниот просечен профит во последните четири години не е поголем од 12 отсто оваа година, тие нема да се опфатат. За симулација, компанија има просечен профит последните четири години од еден милион евра, оваа година му се дозволува раст од 20 отсто, тоа значи 1,2 милиони евра. До 1,2 милиони евра ќе имаат иста даночна стапка каква што имало и сега за данокот за добивка. Разликата од 1,2 милиони евра до евентуално новиот профит, којшто на пример е два милиони евра, односно на разликата од 800 илјади евра се пресметува 30 отсто данок на добивка само за оваа година, или дополнителни 240 илјади евра ќе бидат платени во име на данок на добивка“,
рече Битиќи.
Според вицепремиерот, целта не е да да казнат некого, туку сметаат дека праведноста и правичноста во секој даночен пристап треба да бидат клучни.