Вака премиерот Христијан Мицкоски ја коментира најавата на опозицискиот СДСМ за блокада на Изборниот законик, во рамки на која партијата ќе поднесе 10 000 амандмани
Блокираат закон кој со месеци го договараа. Закон во кој им прифативме сѐ што предложија. Единственото нешто што побаравме е дијаспората да може да гласа по електронски пат уште на следните претседателски избори. Прво го прифатија, а денес го блокираат и бараат бледи алиби-аргументи.
Вака премиерот Христијан Мицкоски ја коментира најавата на опозицискиот СДСМ за блокада на Изборниот законик, во рамки на која партијата најави дека ќе поднесе 10 000 амандмани.
Во објавата на Фејсбук, Мицкоски оцени дека опозицијата по првпат има шанса вистински и суштински да биде за европската иднина на Македонија и тоа, како што вели, не со менување на Уставот, туку со реформи.
„Ајде вака: предложете амандмани со кои барате корекција на начинот на заокружување и поднесување приговори. Веднаш ќе ви ги прифатиме. Повлечете ги другите амандмани и да го изгласаме Изборниот законик. Нашата дијаспора има право да учествува по електронски пат на следните претседателски избори, во време кога во светот вештачката интелигенција ќе има клучна улога“,
пишува Мицкоски на социјалните мрежи.
Премиерот обвини дека, откако ја распродале и ја понижиле Македонија додека беа на власт, опозиционерите од СДСМ сега грчевито се борат и да ја блокираат земјата.
„Исплашени се дека по декемврискиот извештај, сега и во јунскиот извештај на Европската комисија за напредокот на земјите од Западен Балкан повторно ќе бидеме најдобри… Но, имам лоша вест за нив и нивните коалициски леви партнери: Македонија ќе ве победи вас и вашите блокади. Повторно ќе добиеме најмногу буџетски средства и повторно ќе добиеме најмногу отворени фондови за финансирање на проекти“,
додава Мицкоски.
Пратеникот и лидер на СДСМ, Венко Филипче, попладнево објави дека пратеничката група на социјалдеморкатите подготвила 10 000 амандмани и дека ќе го блокира носењето на предложениот Изборен законик бидејќи, според него, содржи решенија кои се недемократски и отвораат простор за злоупотреба и контрола на изборниот процес.