Една од клучните новини во новото законско решение, меѓу другото, е одредбата за дислокација на објектите за игри на среќа на 500 метри од основните и средните училишта
Откако парламентот ги усвои измените на Законот, од Здружението на вработени во секторот за игри на среќа „Сакам да работам“ порачаа дека се разочарани од одлуката на пратениците и дека од претседателката Гордана Сиљановска-Давкова бараат да не го потпишува указот за стапување во сила на законското решение
Со 60 гласа „за“ и 20 „против“, Собранието денеска ги усвои измените на Законот за игри и среќа и за забавните игри. Една од клучните новини во новото законско решение, меѓу другото, е одредбата за дислокација на објектите во кои се приредуваат игри на среќа на 500 метри од основните и средните училишта во државата.
Новото законско решение, како што велат од Министерството за финансии, има за цел да обезбеди поголема заштита на граѓаните, особено на младите, да ја намали сивата економија, да ги зајакне контролата и надзорот врз приредувањето на игрите на среќа, да придонесе во борбата против перењето пари и финансиските злоупотреби и да создаде фер и транспарентни услови за работа на сите приредувачи.
Оттаму посочуваат дека со Законот посебен акцент е ставен и на регулирањето на рекламирањето на игрите на среќа и дека по првпат јасно се забранува рекламирање на надворешниот дел од деловните простории, како и користење светлечки и агресивни реклами. Во насока на поефикасна контрола, додаваат од Министерството за финансии, Законот воведува и задолжително поставување ГПС-систем за позиционирање на секој автомат за игри на среќа, ВЛТ и терминал за електронски игри, поврзан со Управата за јавни приходи.
Откако парламентот ги усвои измените на Законот, од Здружението на вработени во секторот за игри на среќа „Сакам да работам“ порачаа дека се разочарани од одлуката на пратениците и дека од претседателката Гордана Сиљановска-Давкова бараат да не го потпишува указот за стапување во сила на законското решение.
„Постепеното затворање на легалните објекти за игри на среќа ќе предизвика хаос. Ќе никнуваат играчници на диво по подруми, на државата ќе ѝ се лизга од раце досегашната контрола, младите ќе станат лесна цел на профитери од црниот пазар. Дежурните критичари на игрите на среќа, кои со години водат негативна кампања за овој економски сектор, никогаш нема да преземат одговорност за последиците што неминовно следуваат“,
велат од здружението „Сакам да работам“.
Најавуваат дека за секое изгубено работно место ќе ги користат сите демократски и правни механизми за борба.