На новинарското прашање како системски да се реши ситуацијата, во насока што Вашингтон постојано ја надополнува т.н. „црна листа“, и дали постојат докази против одредени поранешни или актуелни функционери, Тошковски рече дека е добро што институциите конечно се будат и почнуваат да ја спроведуваат правдата пред македонската јавност
Би побарал трпение од македонската јавност во овој момент, рече министерот за внатрешни работи Панче Тошковски одговарајќи на новинарско прашање дали доказите што ги има Вашингтон ги има и Скопје во врска со ставањето на поранешниот прв вицепремиер Артан Груби од Демократската унија за интеграција (ДУИ) и судијата во Апелацискиот суд Скопје, Енвер Беџети, на т.н. „црна листа“ на Соединетите Американски Држави.
„Добро ѝ е познато на јавноста дека никогаш не шпекулирам и никогаш не отворам информации за јавноста што се несоодветни во рамки на сето она поставување што е во надлежност на Министерството за внатрешни работи. Би побарал трпение од македонската јавност и во овој дел, сега-засега“,
рече тој.
На новинарското прашање како системски да се реши ситуацијата, во насока што Вашингтон постојано ја надополнува т.н. „црна листа“, и дали постојат докази против одредени поранешни или актуелни функционери, Тошковски рече дека е добро што конечно се будат институциите и почнуваат да ја спроведуваат правдата пред македонската јавност.
Американскиот Стејт департмент завчера соопшти дека поранешниот прв вицепремиер Артан Груби од Демократската унија за интеграција (ДУИ) и судијата во Апелацискиот суд во Скопје, Енвер Беџети, се ставени на т.н. „црна листа“ на САД.
Груби и Беџети се најдоа на листата поради вмешаност во „значителна корупција“, конкретно поради примање поткуп во врска со судските процеси поврзани со ексдиректор на поранешната Управа за безбедност и контраразузнавање (УБК), Сашо Мијалков.
Покрај Груби и Беџети, на најновото проширување на американската „црна листа“ се наоѓаат и членови на нивните потесни семејства.
Американската амбасадорка Анџела Агелер вчера на прес-конференција рече дека ставањето на поранешниот вицепремиер Артан Груби и судијата Енвер Беџети на „црната листа“ на САД е за да се повикаат на одговорност оние поединци чии криминални дејности ги поткопуваат безбедноста, стабилноста и вредностите на управување.
Таа нагласи дека доказите за нивните влијанија се достапни и очекува македонските институции да преземат мерки.
Лидерот на ДУИ, Али Ахмети, вели дека како партија ја почитуваат одлуката на американскиот Стејт департмент, со која нивниот висок функционер Артан Груби се најде на т.н. „црна листа“ на САД, но дека тој ќе има право да ја обжали одлуката и дека тоа ќе го стори служејќи се со факти.
Прашан дали доколку се утврди дека е виновен, Груби ќе биде отстранет од партијата, Ахмети рече дека нема потреба ДУИ да го отстрани, туку дека самиот ќе се повлече од партиските функции бидејќи е совесен и одговорен.