Арсовска се пофали дека градот се чисти и дека е извојувана победа

Успеавме да извојуваме уште една победа со цел заштита на јавниот интерес, интересот на скопјани. Скопје се чисти, екипите на „Комунална хигиена“ Скопје се на терен, состојбата во претпријатието е нормализирана, пишува Арсовска на Фејсбук

Градоначалничката Данела Арсовска на својот фејсбук-профил се пофали дека екипите на „Комунална хигиена“ се на терен и дека градот се чисти. Според неа, состојбата во претпријатието „Комунална хигиена“, каде што вработените неколку дена штрајкуваа и не го собираа ѓубрето, е нормализирана.

„Успеавме да извојуваме уште една победа со цел заштита на јавниот интерес, интересот на скопјани. Скопје се чисти, екипите на ‘Комунална хигиена’ Скопје се на терен, состојбата во претпријатието е нормализирана“,

пишува Арсовска.

Во објавата Арсовска вели „не дозволивме и нема да дозволиме мафијашки структури заедно со политичкиот смет да наштетат на интересите на македонските граѓани“.

„Она што го ветив пред граѓаните е дека ќе работам чесно и во нивен интерес и ништо нема да ме спречи да го исполнам дадениот збор“,

додава таа.

И покрај објавата на Арсовска, вработените на „Комунална хигиена“ и денеска се пред претпријатието каде што го продолжуваат штрајкот за кој главна причина е отпуштањето на дел од работниците во претпријатието, а другите барања се зголемување на платите, исплата на К-15 и бенефициран работен стаж.

(ФОТО+ВИДЕО) Вработените во „Комунална хигиена“ и денеска протестираат во седиштето на претпријатието

Во меѓувреме градоначалниците од Скопскиот плански регион имаат состанок на кој, како што велат, бараат решение на проблемот со преполните контејнери во Скопје. Градоначалникот на Центар, Горан Герасимовски утрово изрази верување дека на состанокот ќе се разговара и за одземање на ингеренциите на „Комунална хигиена“, прашање кое, како што рече тој, неколку месеци е отворено.

Герасимовски: Верувам дека со другите градоначалници ќе разговараме за одземање на ингеренциите од ЈП „Комунална хигиена”