Градоначалникот на Општина Центар очекува дека на денешниот итен состанок на Скопскиот плански регион ќе се разговара за одземање на ингеренциите на „Комунална хигиена“
Темата за расформирање на „Комунална хигиена“ и одземање на ингеренциите од јавното претпријатие, заедно со машинеријата е отворена неколку месеци. Верувам дека денеска на состанокот на Скопски плански регион ќе разговараме за тоа и ќе бараме решение за проблемот со кој се соочуваме, вели денеска градоначалникот на Центар, Горан Герасимовски, во изјава за ТВ Телма во пресрет на состанокот со неговите колеги.
Градоначалниците на скопските општини денеска на итен состанок ќе бараат решение за проблемот со преполните контејнери и расфрленото ѓубре со кој Скопје се соочува неколку дена.
Денеска продолжи акцијата на скопските градоначалници за празнење на контејнерите и собирање на расфрленото ѓубре.
Герасимовски вели дека Општина Центар рано утрово започна со чистење на отпадот, а во акцијата се вклучени речиси сите вработени од комуналната служба во ЈП ПОЦ со целата механизација, како и голем камион за кревање контејнери. Покрај собирањето на ѓубрето, Герасимовски вели дека на терен е пуштена и цистерната која ги мие контејнерите и просторот околу нив.
Поради штрајк на вработените во „Комунална хигиена“ контејнерите во Скопје со денови се преполни.
Штрајкот почна пред два дена. Како главна причина тие го наведуваат отпуштањето на дел од работниците во претпријатието. Другите барања се зголемување на платите, исплата на К-15 и бенефициран работен стаж.