„Тужбата е за тоа што сум ја навредил со тоа што сум кажал дека била кандидат поддржан од ВМРО-ДПМНЕ. Дали Данела Арсовска се чувствува навредена што била кандидат поддржана од ВМРО-ДПМНЕ?“, реагираше Каевски по рочиштето
Арсовска, пак, уште во текот на кампањата ги отфрли обвинувањата нарекувајќи ги лажни, а СДСМ го обвини дека го прави тоа поради нервоза зашто таа ќе направи ревизија на работењето на Град Скопје кој дотогаш беше управуван од нивен кадар
Градоначалничката на Скопје, Данела Арсовска, и пратеникот и портпарол на СДСМ, Дарко Каевски, денеска се соочија на рочиште во Основниот граѓански суд за изјави кои пратеникот ги даде во текот на кампањата за локалните избори минатата година.
Станува збор за тужба во врска со прес-конференцијата на која Каевски ја обвини Арсовска дека фирмите со кои таа раководела имаат долг од 54 000 евра за струја.
„Фактите во делот на долгот за струја којшто го имала фирмата каде што сопственик или управител била Данела Арсовска е нешто што не може да се побие. Тужбата е за тоа што сум ја навредил, со тоа што сум кажал дека била кандидат поддржан од ВМРО-ДПМНЕ. Дали Данела Арсовска се чувствува навредена што била кандидат поддржана од ВМРО-ДПМНЕ? Ако така се чувствува треба да го одговори пред јавноста. Фирмите воопшто не беа предмет ниту на дискусија, ниту доказите. Предмет на дискусија беше насочен како јас докажувам дека била кандидатка на ВМРО-ДПМНЕ“,
рече Каевски по денешното рочиште.
Арсовска, пак, уште во текот на кампањата ги отфрли обвинувањата нарекувајќи ги лажни, а СДСМ го обвини дека го прави тоа поради нервоза зашто таа ќе направи ревизија на работењето на Град Скопје кој дотогаш беше управуван од негов кадар.
„Стравот и нервозата се ти коишто предизвикаа некој за еден час да трча и да излегува со лажни обвинувања и со нешта коишто навистина се небулозни, за кои денеска ќе си следи соодветна тужба. Јас немам намера на два дена пред завршувањето на овие избори, односно пред моментот кога скопјани ќе имаат можност да одлучуваат, да се објаснувам со луѓе кои бесрамно лажат за да го скријат својот срам и за луѓе кои сакаат да си ги скријат криминалите“,
рече Арсовска на 14 октомври лани во кампањата за локалните избори.