Според независната кандидатка поддржана од ВМРО-ДПМНЕ, обвинувањата доаѓаат поради нервозата кај СДСМ откако вчера таа најавила дека ќе го ревидира сето она што е направено во Град Скопје и како се трошеле буџетските пари, како и дека за тоа ќе се сноси одговорност
СДСМ и денеска продолжи со обвинувањата кон независната кандидатка за градоначалничка на Скопје, Данела Арсовска, откако вчера објави дека фирма со која таа раководела должи 54 илјади евра за струја.
Со транспарент „Империјал Данела крадела струја!“, пратеникот на социјалдемократите денеска пред седиштето на ВМРО-ДПМНЕ одржа нова прес-конференција на истата тема.
„Објавуваме уште еден документ кој го потврдува големиот скандал со фирмите на Данела Арсовска кои не плаќале струја со години односно не платиле над 54 000 евра! Токму во периодот кога е направен долгот, или слободно може да кажеме кражбата на струја, Данела била управител на оваа компанија, ‘Империал Данела’, а потоа ‘Империал’. Во 2014 година ЕВН констатира кражба на струја во вредност од 54 000 евра! А токму од 2013 година до 2014 година, била управител на оваа компанија. Тоа е вистината која ја покажуваат овие документи“,
рече Каевски.
Арсовска, пак, и денеска како и вчера обвинувањата ги нарече лажни и најави дека ќе поднесе тужби, а на политичките противници им порача дека не се плаши од нивните притисоци.
Според неа, обвинувањата доаѓаат поради нервозата кај СДСМ откако вчера таа најавила дека ќе го ревидира сето она што е направено во Град Скопје и како се трошеле буџетските пари, како и дека за тоа ќе се сноси одговорност.
„Стравот и нервозата се ти коишто предизвикаа некој за еден час да трча и да излегува со лажни обвинувања и со нешта коишто навистина се небулозни, за кои денеска ќе си следи соодветна тужба. Јас немам намера на два дена пред завршувањето на овие избори, односно пред моментот кога скопјани ќе имаат можност да одлучуваат, да се објаснувам со луѓе кои бесрамно лажат за да го скријат својот срам и за луѓе кои сакаат да си ги скријат криминалите. А срамот, стравот и ова безобразие сите скопјани го гледаат. Она што мора да се знае е дека 42 години немам никаква дамка – ниту лично, ниту професионално. Доколку би имала, не би се впуштила во ваква трка да се натпреварувам со вакви бесрамни луѓе коишто 4 години го трошат Буџетот на скопјани и ниту еднаш не дадоа отчет каде отидоа овие пари, а ни едно од ветените нешта во програмата во 2017 година не реализираа“,
изјави Арсовска.
Денеска реагираше и ВМРО-ДПМНЕ чиј портпарол, Димче Арсовски, изјави дека единствени докажани криминалци кои краделе струја се семејството Заеви, прозивајќи го таткото на премиерот Зоран Заев.
„Имено, Панче Заев, татко му на Зоран Зае, кој очигледно имал што да наследи од него, а тоа е крадењето, е осуден за крадење струја. Ова е кривичната пријава којашто е поднесена против Панче Заев кој крадел струја, а тука ја имаме и пресудата каде што е осуден за крадење струја, која медиумите електронски ќе ја добијат. Имено, 15 470 киловати струја биле украдени од страна на фамилијата Заеви, поточно од татко на Зоран Заев, Панче Заев, што значи единствен и ноторен криминалец е овој човек чиј син 4 години ја краде Република Македонија по принципот на неговото функционирање, а уште десетина години претходно ја крадеше општина Струмица. Истиот овој човек преку семејните фирми од парите на граѓаните имаше земено стотици илјади евра тендери во општина Струмица каде што син му беше градоначалник пред да стане премиер“,
обвини Арсовски.
*Поврзани вести:
СДСМ ја нападна противкандидатката за Скопје: Фирми на Арсовска должат 54 илјади евра за струја
ВМРО-ДПМНЕ со контранапад по обвинувањата кон Арсовска: Каевски одработува за станот
Арсовска најави тужба за Каевски: Згрозена сум од конструкциите на СДСМ