За Мијалков, второстепениот суд смета дека тој како помагач не преземал реални, туку вербални дејствија и нагласува дека други лица во случајот биле осудени на помали затворски казни или условни. За Груевски, пак, смета дека Кривичен не ги ценел доволно отежнувачките околности и затоа му ја зголеми казната на уште две години затвор. Конфискацијата на имотот вреден околу три милиони евра останува
Апелацискиот суд Скопје донесе одлука за пресудата на Основниот кривичен суд за случајот „Плацови на Водно“ и затворската казна на ексдиректорот на УБК, Сашо Мијалков, ја замени со условна осуда, а на поранешниот премиер Никола Груевски ја зголеми за две години – од седум на девет.
Со првостепената пресуда, Мијалков беше осуден на една година и три месеци затвор за помагање во кривичното дело перење пари. Меѓутоа, Апелација нагласува дека тој бил само помагач и неговите дејствија не биле реални, туку вербални. Тука прави споредба и со останатите осудени во случајот кои иако не беа помагачи, добија помали затворски казни или условни осуди, а тоа се: Јордан (Орце) Камчев, кој беше осуден на 1 година затвор, и Ристо Новачевски и Ненад Јосифовиќ, кои беа осудени условно од првостепениот суд.
Условната казна за поранешниот директор на УБК значи дека затворот од една година и три месеци нема да се изврши ако тој во наредните четири години не стори ново кривично дело.
Објаснувањето за замената на затворската со условната казна на Мијалков од Апелација гласи:
„По однос на обвинетиот С. М. од С. кој е помагач од член 24 на Кривичниот законик за кривично дело од член 273 став 1 кој не преземал реални дејствија и постапки, туку дејствијата му се вербални, за кое се огласени виновни и осудени Н. Г. од С., Ј. К. од С.: 1 (една) година затвор, Н. Ј. алтернативна мерка – условна осуда, Р. Н. од С. алтернативна мерка – условна осуда, па советот оцени дека првостепениот суд го повредил член 24 од Кривичниот законик, во кој е наведено дека помагачот се казнува исто или поблаго од сторителот на делото. Имајќи го предвид член 24 од Кривичниот законик и во сооднос и корелација на казните на Н. Г. од С. (кој е во бегство), Ј. К.: – една година затвор, Н. Ј. алтернативна мерка условна осуда, Р. Н. алтернативна мерка – условна осуда директни сторители со конкретни дејствија и постапки, како и одлуките на Врховниот суд на РСМ и Врховните судови на земјите од поранешна СФРЈ, одлучи како во изреката“.
Груевски, пак, во „Плацови на Водно“ е осуден за две кривични дела: перење пари и противправно стекнување и прикривање имот. За првото доби пет, а за второто три години затвор, кои првостепениот суд ги смести во единствена затворска казна од седум години затвор. Но, Апелација смета дека ваквата казна е мала и дека Кривичен не ги ценел доволно отежителните околности, па му одреди седум години затвор за перење пари и три години и шест месеци за противправно стекнување и прикривање на имот или единствена затворска казна од девет години.
„По однос на казните утврдени за обвинетиот Н. Г. од С. Апелациониот суд Скопје оцени дека првостепениот суд недоволно ги ценел отежителните околности и ја уважи жалбата на Основното јавно обвинителство за гонење организиран криминал и корупција по однос на изречената казна и одлучи како во изреката“,
велат од Апелација.
Во останатиот дел второстепениот суд ја потврди пресудата од Кривичен вклучително и конфискацијата на имот кој е со приближна вредност од три милиони евра. За потсетување, меѓу конфискуваниот имот со пресудата се: два стана на „Бихаќка“ (соседните каде што живееше Груевски); плацовите на Водно со површина од околу 11 000 квадратни метри; две парцели во Крушево и трите стана во „Панорама резиденс“ во центарот на Скопје.
Првостепениот суд пресудата ја донесе на 21 април лани, а Груевски и Мијалков, како и Основното јавно обвинителство за гонење организиран криминал и корупција, поднесоа жалби. По одржана јавна седница на 14 февруари годинава, следуваше и денеска објавената одлука.
Камчев, кој беше осуден на една година затвор, не се жалеше на пресудата, туку заедно со казната договорена со спогодбата во предметот „Империја“, веќе ја отслужи во затворот од отворен тип во Струга и сега е на слобода.