Освен аналитичарот Муслиу и адвокатот Јевтиќ, според најголемата опозициска партија, имот кријат и директорот на ЈП „Македонски шуми“, Валентин Груевски и Новица Печински, член на Управниот одбор на Здравствениот дом во Берово. Ова, како што велат од ВМРО-ДПМНЕ, се само дел од функционерите на аферата „Тајни имоти“ кои го кријат својот имот, а се директно поврзани со врвот на власта
Откако опозициската ВМРО-ДПМНЕ вчера ја објави аферата „Тајни имоти“ за која тврди дека 123 функционери од СДСМ и ДУИ кријат имот вреден 30 милиони евра, денеска од партијата излегоа со нови детали во врска со лицата вклучени во аферата, а се работи за лица кои, како што велат, имаат директни релации со врвот на власта.
Прв на листата функционери што кријат имот од ВМРО-ДПМНЕ го посочуваат аналитичарот Алберт Муслиу, за кого велат дека криејќи се под превезот на независен аналитичар редовно ги брани ставовите на владејачкиот СДСМ.
„Но, колку навистина е независен? Алберт Муслиу на 19 декември 2017 година е именуван за претставник определен од Владата во Управниот одбор на Фондот на холокаустот на Евреите од Македонија. Муслиу пет години нема поднесено анкетен лист до Антикорупциската комисија. Што крие Муслиу?“
прашува пратеникот од ВМРО-ДПМНЕ, Бране Петрушевски, на денешната прес-конференција.
Петрушевски додава дека според истражувањата на ВМРО-ДПМНЕ, Муслиу на сопствено име поседува куќа во Скопје од 118 квадратни метри и стан во Центар од 81 квадратен метар, а дополнително се јавува и како основач и сопственик на повеќе фирми и здруженија на граѓани.
„Имено, тој е основач на здружението Институт за мир и безбедност и истражување на политики КОНИЦА Скопје, како и на фирмата за трговија МАКРО МЕД“,
додава Петрушевски.
Како еден од функционерите блиски до власта што не го пријавиле имотот во ДКСК, од ВМРО-ДПМНЕ го посочија и адвокатот Ивица Јевтиќ, кој, како што вели Петрушевски, е најпознатиот адвокат на СДСМ кој ги поднесува фамозните тужби за функционери од партијата за навреди и клевети.
„Од анализата која ја направивме може да се види дека Јевтиќ на свое име поседува стан во Скопје, од 2015 година основач е на Адвокатското друштво ‘Тошиќ и Јевтиќ’, а во 2020 година во ноември ја основа градежната компанија’ ФИЗ Констракшн’ ДООЕЛ Скопје. Јевтиќ, покрај тоа што е адвокат на СДС, и тој самиот бил партиски функционер како член на Надзорниот одбор на партијата“,
вели пратеникот Петрушевски од ВМРО-ДПМНЕ.
„Патем, Јевтиќ, бил член на надзорниот одбор на СДС, се јавува во голем број судски случаи каде што партијата или нејзини истакнати функционери се странка во постапката. Инаку, Јевтиќ е член на Управниот одбор на Прифатниот центар за баратели на азил“,
додава Петрушевски.
Освен аналитичарот Муслиу и адвокатот Јевтиќ, според најголемата опозициска партија, имот кријат и директорот на ЈП „Македонски шуми“, Валентин Груевски и Новица Печински, член на Управниот одбор Здравствениот дом во Берово.
Ова, како што велат од партијата, се само дел од функционерите на аферата „Тајни имоти“ кои го кријат својот имот, а се директно поврзани со врвот на власта.
Премиерот Димитар Ковачевски денеска порача дека ако опозицијата има сознанија дека некој крие имот треба да ги достави до Антикорупциската комисија.
„Јас за таа афера немам никакви сознанија. Гледа дека вчера ВМРО-ДПМНЕ имаше преку еден свој пратеник одредена најава. Се што имаат како одредени индикации треба да го достават до Антикорупциската комисија бидејќи секој функционер е должен се она што го има стекнато во текот на својот живот да го пријави во својот анкетен лист исто како што јас сум го направил тоа“,
изјави денеска Ковачевски.
Министерот за правда Никола Тупанчески, пак, денеска изјави дека очекува во најскоро време да биде доставена нацрт-верзијата на предлог-законот за потекло на имот, но тврди дека и без него може да се открие незаконски стекнатиот имот на функционерите.