Претседателот на САД, Џо Бајден, во март годинава објави дека американската војска ќе изгради привремено пристаниште на медитеранскиот брег на Појасот Газа за испраќање хуманитарна помош по морски пат
Соединетите Американски Држави (САД) почнаа да градат пристаниште во близина на брегот на Газа – проект кој треба да ја олесни испораката на хуманитарна помош на палестинската територија, објави Пентагон во четвртокот.
Пристаништето, како што пишува новинската агенција Ројтерс, треба да профункционира на почетокот на мај.
Претседателот Џо Бајден во март објави дека американската војска ќе изгради привремено пристаниште на медитеранскиот брег на Појасот Газа за испраќање хуманитарна помош по морски пат.
Изградбата на привременото пристаниште е дел од напорите за спречување на гладот во палестинската енклава која веќе пет месеци се наоѓа среде војната меѓу Израел и Хамас, притоа опустошувајќи ја и втурнувајќи ги нејзините 2,3 милиони луѓе во хуманитарна катастрофа.
„Можам да потврдам дека американските воени бродови започнаа со првите фази од изградбата на привременото пристаниште и насипот во морето“,
изјави за новинарите портпаролот на Пентагон, Патрик Рајдер.
Рајдер додаде дека Пентагон следи некој вид минофрлачки напад во Газа што предизвикал минимална штета во близина на областа каде што се гради пристаништето, но додаде дека американските сили сè уште не почнале да преместуваат ништо во областа и дека нема американски сили на теренот.