Од Амбасадата на САД во Косово ја повикуваат Приштина да не ги затвора вратите за „Отворен Балкан“ и да прифати решенија што носат резултати за граѓаните на Косово
Поради најавите на владата на Косово дека нема да се приклучи кон иницијативата „Отворен Балкан“ (поранешен „Мини-Шенген“), од Амбасадата посочуваат дека владата на Косово мора да одлучи на кои иницијативи ќе им се придружи и кои иницијативи најдобро ја поддржуваат нејзината економска визија.
„Сепак, ние ја охрабруваме владата да се приклучи кон регионалните напори за економска интеграција и да прифати решенија што носат резултати за граѓаните на Косово, истовремено подобрувајќи ги врските со соседите“,
објави Радио слободна Европа.
Амбасадата цени дека посилната економска и политичка интеграција е од суштинско значење за одржлив мир и просперитет, што би ги зајакнало постојните напори на Косово да ги заврши реформите потребни за идно пристапување во ЕУ.
„Го охрабруваме Косово да бара можности за намалување на трговските бариери, зголемување на нејзината економска конкурентност и изградба на регионално интегрирана и еластична економија, која дава резултати за сите граѓани на Косово“,
нагласуваат од Амбасадата на САД во Косово.
Освен Самоопределување на премиерот Албин Курти, иницијативата „Отворен Балкан“ не е поддржана ниту од опозициските косовски партии.
Курти изјави дека иницијативата „Отворен Балкан“ нема визија за регионот, а потоа министерката за надворешни работи Доника Гервала оцени дека тоа е опасна идеја, која создава илузија за алтернатива на европската интеграција.
Иницијативата ги вклучува Македонија, Србија, Албанија, а на првиот трилатерален состанок во Нови Сад во 2019 година, на кој присуствуваа српскиот претседател Александар Вучиќ и македонскиот и албанскиот премиер, Зоран Заев и Еди Рама, беше потпишана декларација за слободно движење стоки, луѓе, услуги и капитал.
На минатонеделниот состанок во Скопје, на 29 јули, основачите на „Отворен Балкан“, Рама, Вучиќ и Заев, ја повторија поканата на Иницијативата да ѝ се приклучат и другите земји во регионот. Тогаш беше објавено дека од 1 јануари 2023 година граничните контроли меѓу членките на иницијативата ќе бидат укинати.