СДСМ вчера објави свој кандидат за градоначалник на Тетово, која е една од општините во кои свои кандидати, најверојатно, ќе имаат и другите партии од владејачката коалиција на централно ниво
Каде што можеме да се поддржиме во првиот круг, ќе го направиме тоа, каде што има повеќе кандидати, во вториот круг, ќе им дадеме поддршка на оние што ќе добијат најмногу доверба наспроти кандидатите на опозицијата, изјави денеска премиерот и лидер на СДСМ, Зоран Заев, коментирајќи за соработката меѓу партиите од владејачката коалиција на централно ниво на претстојните локални избори.
„Од самиот почеток стоиме на заложба за заемна поддршка на овие локални избори. Сепак, ова се локални избори, каде што се избираат личности. Даваме широк спектар на кандидати за градоначалници и советници. Логично е дека каде што можеме во првиот круг, како коалициски партнери, ќе се поддржуваме. Гледаме дека Беса, иако е помал коалициски партнер од СДСМ и од ДУИ, секаде каде што може настапува со свои кандидати. Затоа даваме шанса, кој и да е од нашите коалициски партнери, ДУИ, Беса, ДПА, чиј кандидат ќе добие најголема поддршка од граѓаните, да го поддржиме сите во вториот круг, наспроти опозицијата“,
рече Заев.
Тој оцени дека е јасно единството на коалицијата на централно ниво, која се преточува во коалиција на локално ниво, со сите специфики за локални избори, на кои во преден план се личностите и нивните програми.
СДСМ вчера објави свој кандидат за градоначалник на Тетово, а тоа е стоматологот Хамдија Елезовиќ. Во оваа општина, која е најспецифична во однос на политичката битка меѓу партиите од т.н. албански блок, свои кандидати, најверојатно, ќе имаат и другите партии од владејачката коалиција.
Се очекува Беса во Тетово да оди повторно со партискиот лидер Билал Касами, кој во 2017 година изгуби во вториот круг од актуелната градоначалничка Теута Арифи, која е можно да биде повторно кандидатка на ДУИ, а тогаш беше поддржана и од СДСМ. ДПА, пак, од поодамна најави нова кандидатура на поранешниот градоначалник Сади Беџети.
СДСМ до вчера утврди кандидати за градоначалници за 51 од вкупно 81 единица на локалната самоуправа во земјава. Заев рече дека денеска продолжуваат состаноците во партијата, како и во текот на викендот, за утврдување на преостанатите кандидатури, ама посочи дека рокот за поднесување на кандидатурите истекува на 11 септември.
На прашање околу програмската понуда на СДСМ за локалните избори, со оглед на тоа што и натаму не се решени многу урбанистички проблеми, посебно во Скопје, Заев рече дека главниот град сега е поинаква приказна, зашто, според него, заврши мегаломанството.
„Ветивме дека Скопје ќе продолжи да се гради, но дека ќе се откажеме од мегаломанските проекти. Сега Скопје се гради со усул, и во периферијата и во централниот дел во сите градски општини рамноправно, затоа што не смееме и не треба да го застанеме развојот на градот. И во најцентралните скопски општини – Карпош, Центар и Аеродром не може да се каже дека има мегаломанство. Тоа е спречено не само со волјата на градоначалниците и советниците, туку и со уставното право на сопственост е неприкосновено во демократијата и кај нас, но сега ставивме ред во растот и развојот на Скопје“,
рече Заев, во одговор на новинарско прашање, при денешното означување на почетокот на градба на мостот „Љубљанска“ во Скопје.
Измените на законите за урбанистичко планирање, додаде, се прават согласно укажувањата. Донесен е нов Закон за урбанистичко планирање, каде што, согласно со укажувањата, се сменети параметрите, а тоа е паркинг во самата парцела и минимум 20 отсто зелена површина во самата парцела.
Нагласи дека сѐ уште се градат објекти за кои се издадени одобренија за градба во 2013 и во 2015 година, како во град Скопје така и во Охрид, кои, како што кажа, се проблем и за УНЕСКО.
„Таквите права може само преку суд да се оспорат заради одредени законски решенија кои се донесени после издавањето на овие одобренија за градба. Денеска се откажани сите проекти кои беа замислени со 30, 50 и 60 ката, максимален габарит и блоковска поставеност. Веќе никаде во државата нема блок на згради кој го спречува флуктуирањето на воздухот. Просторниот план и Законот за просторно и урбанистичко планирање го лимитира мегаломанството“,
рече Заев.