Директорот на фирмата во изјава за „360 степени“ вели дека проблемот со недостигот на средства за функционирање на Јавното сообраќајно претпријатие „Скопје“, поради што денеска колабира јавниот превоз во градот, е и проблем на „Слобода превоз“
„Како да дојдам до таму“; „Нема автобуси, за такси треба да дадам цело богатство“; „Ако наиде приватен, ќе можам барем половина пат да скратам“. Ова беа најчестите коментари што утрово може да се слушнат на скопските улици и покрај автобуските постојки низ кои поминуваат и ги опслужуваат автобусите на единствениот приватен градски превозник „Слобода превоз“.
Но, таму, како што вели за „360 степени“ директорот на фирмата Ленин Јовановски, работата не е розова, а проблемот со недостигот на средства за функционирање на Јавното сообраќајно претпријатие „Скопје“, поради што денеска колабираше јавниот превоз во градот, е и проблем на „Слобода превоз“.
Причината е во централизираниот систем на наплата на услугите за градски автобуски превоз, како и контролата на линиите по кои сообраќаат автобусите, што сега е целосно во надлежност на ЈСП „Скопје“ и на Град Скопје.
Делот на наплатата на превоз што се врши со автобусите на приватниот превозник оди во касата на ЈСП „Скопје“ од каде што потоа, како што вели Јовановски, тој дел Јавното претпријатие треба да му го префрли на „Слобода превоз“.
„Проблемот со ЈСП останува и е проблем и на ‘Слобода превоз’. Моменталниот долг што ЈСП го има кон нашето претпријатие е 45,5 милиони денари, односно станува збор за ненаплатени средства, аванси и слично за месеците јули, август и септември. И ние се соочуваме со нередовни исплати од три-четири месеци. Се обидуваме да менаџираме, работиме, додека да се реши оваа финансиска криза, но имаме и ние проблеми. И јас се соочив со притисоци од вработените и најави за протести, но направивме обиди и успеваме да ги смириме нашите возачи. Имаме вработени што не зеле плата три месеци токму поради овој долг“,
вели Јовановски за „360 степени“
Во моменти кога се очекува решение на актуелната ситуација со ЈСП со недостигот на средства, Јовановски вели дека решението е добредојдено и за приватниот превозник.
„Градот, како што сум информиран, треба да му префрли средства на ЈСП за да се реши проблемот. Ако успеат да го решат со ЈСП, тоа треба да биде поволно и за нас. ЈСП ги собира сите финансиски средства од јавниот превоз и оној дел што е за нас, односно услугата што ние ја обезбедуваме преку линиите што ги опслужуваме треба да ни стигне нам“,
вели Јовановски.
Инаку, во однос на тоа колку приватниот превозник може да биде алтернатива во актуелната ситуација, кога автобусите на ЈСП останаа паркирани, Јовановски вели дека ниту можат ниту некој побарал од нив да го дополнат возниот ред со нови линии.
„Ние моментално сме на линиите на кои сме овластени да возиме. Никој и не побарал од нас да се вклучиме на линиите каде што има недостиг од автобуси. И да сакаме, не можеме да се вклучиме по наша желба, затоа што не смееме. Ние мораме да возиме според строго утврден ред и на строго одредени релации. Движењето се следи со ГПС-систем и сме контролирани од ЈСП и од Град Скопје, и мораме да возиме според строго утврдени правила“,
објаснува Јовановски.
Утринава автобусите на ЈСП „Скопје“ останаа паркирани во автобазите во Автокоманда и Ѓорче Петров поради протестот на возачите кои бараат исплата на платите за септември, што ги натера скопјани, барем оние што редовно го користат јавниот превоз, да бараат алтернативни решенија како да стигнат до работните места или онаму каде што имаа потреба.
Денеска од ЈСП испратија соопштение со реакција на протестот. Од ЈСП „Скопје“ велат дека дваесетина луѓе од ССМ и т.н. независен синдикат на ЈСП спречуваат возачите на автобуси редовно да си ги вршат своите работни задачи, спротивно на член 35 од Законот за јавните претпријатија со кои се уредува начинот на штрајк.
Со соопштение денеска се огласија и од Град Скопје кои велат дека уште во текот на вчерашниот ден, по завршување на вонредната седница на Советот на град Скопје, е изготвена одлука за пренамена на средства со кои ќе се исплати септемвриската плата на вработените во ЈСП „Скопје“.
Синдикалните претставници при ЈСП „Скопје“ вчера кажаа дека возачите денеска нема да возат зашто се гладни и уште еднаш побараа исплата на платите. Тие им се извинија на граѓаните, со образложение дека ова морало да се случи за еднаш засекогаш да се реши проблемот со редовни плати во ЈСП.
За неисплатените плати на вработените во ЈСП се разговараше и на вчерашната вонредна седница на Советот на Град Скопје. Доцна попладнето беше изгласана иницијатива со која се побара од градоначалничката на Град Скопје до петок до 12 часот да достави одлука за прераспределба на средства за да се исплатат платите на вработените во ЈСП.
Одлуката следуваше при тричасовната расправа меѓу советниците кои си ја префрлаа вината за тоа кој е виновен за состојбата во претпријатието. Од ВМРО-ДПМНЕ побараа одговорност од Арсовска, а од СДСМ обвинија дека за првпат скопјани ќе останат без градски превоз и дека за тоа е виновна локалната власт.
Од Владата, пак, пред два дена најостро ги отфрлија обвинувањата за каков било долг кон ЈСП „Скопје“, како што обвинува раководството на ова јавно претпријатие.
Од Владата, преку соопштение, информираа дека ваквата состојба во којашто се наоѓа ЈСП е показател дека општините неодговорно менаџираат со средствата наменети за превоз на учениците и навремено не ги подмируваат обврските.
За состојбата во која се наоѓа ЈСП „Скопје“ и за денешниот протест на вработените реагираше и ВМРО-ДПМНЕ кои велат дека штрајкот во ЈСП е последица на двојната неспособност на владата и на Данела Арсовска.
Град Скопје вчера ги извади дел од автобусите на ЈСП пред Владата, посочувајќи дека вината за тоа што вработените во ова скопско јавно претпријатие сè уште не зеле плата е кај Владата, односно кај Министерството за образование кое му должи два милиони евра на ЈСП од блок дотации за бесплатниот превоз на средношколци.