Министерот за образование и наука Арбер Адеми објави дека информацијата што се ширеше за уредба со која учебната година ќе продолжи на 18 мај е лажна вест.
Во лажната Уредба која кружеше пишува дека учениците ќе се вратат во училиште и ќе учат во три смени, а часовите ќе се скратат од 45 на 30 минути.
Претходните денови кружеше уште една лажна вест, но за студенти односно дека академската година ќе продолжи на 11 мај. На ова пред два дена реагираа и од Универзитетското собрание на Универзитетот „Кирил и Методиј“ во Скопје.
„Мејлот кој кружи дека наставата на факултетите започнува од 11 мај е ЛАЖЕН. Доколку се разговара за враќање на факултетите и почеток на наставата, ќе бидете информирани од страна на вашите студентски претставнички тела. Најостро го осудуваме ширењето на лажни вести меѓу студентите. Во време на светска пандемија и неизвесност за иднината, не е смешно ниту интересно да се шират такви ‘пренкови’. Бидете одговорни, не е време за ‘тролање’! Сите информации во врска со студиите и мерките за спречување на вирусот можете да ги следите на нашите социјални медиуми“,
реагираа од Универзитетското собрание.