За разлика од критичниот тон на опозицијата кон новиот сет мерки на кабинетот на Спасовски, од СДСМ велат дека тоа се мерки на солидарност, насочени кон зачувување на работните места на граѓаните
Предлог-уредби со законска сила ќе поднесе ВМРО-ДПМНЕ до Владата, како што најавуваат од партијата, од каде што посочуваат дека веројатно министерот за внатрешни работи Наќе Чулев, како претставник на опозицијата, ќе ги брани овие предлози на владина седница. Мерките што ги предлага ВМРО-ДПМНЕ, како што велат од партијата, треба да бидат прифатени од Владата, доколку заедничката цел е добра и стабилна иднина на нашата држава и нашите граѓани.
„Помошта од владата на СДСМ не само што е задоцнета, туку е недоволна. Мерките што ги донесе владата за стопанството и граѓаните се само причина повеќе за огромна и сериозна загриженост“,
се оценува во соопштение на ВМРО-ДПМНЕ.
Според донесените мерки, како што оценуваат од опозицискиот табор, Македонија и нејзините граѓани ги чека црна и тешка економска криза. Пакетот мерки, како што оценува ВМРО-ДПМНЕ, е огромно разочарување за граѓаните и бизнисот и е далеку од доволно за помош на стопанството.
„Затоа ВМРО-ДПМНЕ предлага неколку мерки, за да се помогне на најранливите категории во период кога владее пандемија и се заканува економски колапс на државата. ВМРО-ДПМНЕ, во деновите што следуваат, до Владата ќе достави уредби со сила на закон за мерките кои ги предлага. Така ќе се отвори дебата на самата владина седница за да може претставникот што ќе биде таму и кој е дел од техничката влада да ги брани тие мерки“,
се наведува во партиското соопштение.
Првата мерка што ќе ја достави ВМРО-ДПМНЕ е да се покријат до 50 проценти од трошоците по основ на бруто-плата, преку соодветна методологија. Тоа би важело за месеците март, април, мај и јуни, а потоа, соодветно на ситуацијата, ќе има нови предлози.
Втората мерка е веднаш да се интервенира во вториот задолжителен приватен пензиски фонд и средствата, во висина од 10 милијарди денари кои биле предвидени за оваа година, а веќе во јануари и во февруари една и пол милијарда се уплатени во задолжителниот приватен пензиски столб, да бидат веднаш пренасочени во единствениот државен задолжителен пензиски столб. На тој начин, како што велат од ВМРО-ДПМНЕ, ќе се обезбедат дополнителни осум и пол до 10 милијарди денари.
Премиерот Оливер Спасовски вчера презентираше нов – втор по ред сет мерки за надминување на економските последици од коронавирусот. Вкупно 17 мерки биле усогласен на седница на Економско-социјалниот совет што го формира владата. Мерките кои, меѓу другото, предвидуваат загарантирана минимална плата за приватниот сектор во наредните два месеци и симнување на функционерските плати на ниво на минималец (14 500 денари) наидоа на спротивставени реакции кај синдикатите и стопанските комори.
Претседателот Стево Пендаровски, по вчерашната седница на Советот за безбедност, изјави дека ги поддржува мерките на техничката влада за надминување на здравствената и економска криза, предизвикана од коронавирусот. Со мерките се согласува и лидерот на СДСМ, Зоран Заев, иако дел од неговите предлози за санирање на последиците не се земени предвид. Наспроти тоа, лидерот на ВМРО-ДПМНЕ, Христијан Мицкоски, ги оцени како невкусна шега мерките што вчера ги презентираше премиерот со економскиот тим во владата.
Од СДСМ оценуваат дека Владата презема сериозни чекори кои значат зачувување на работните места за сите погодени од кризата со коронавирусот, мерки што значат гарантиран приход кај секој работник додека трае кризата.
„Ова се мерки вредни 200 милиони евра, мерки на солидарност, на меѓусебно помагање во тешки ситуации, мерки за помош на секое семејство, мерки за помали трошоци на секое домаќинство додека трае кризата. Денеска, сите поединци, целото нашето општество, нашата економија, се ставен пред важен тест кој ќе го положиме само ако сме солидарни, ако си помагаме еден на друг. Заедно ќе ги пребродиме последиците, а потоа заедно ќе продолжиме кон развојот и напредокот“,
велат од СДСМ.