ВМРО-ДПМНЕ во деновите што следуваат до Владата ќе достави уредби со сила на закон за мерките што ги предлага, најави лидерот на опозицијата, оценувајќи дека владините мерки нема да можат да ги користат голем дел од фирмите
Задоцнети и недоволни се мерките за помош на стопанството, а кризата ќе се продлабочи, оцени лидерот на ВМРО-ДПМНЕ, Христијан Мицкоски, откако премиерот Оливер Спасовски презентираше нов пакет економски мерки за кризата предизвикана од коронавирусот.
„Кога состојбата не би била трагична, сигурно некој ќе каже дека Владата се шегува со вакви мерки за стопанството. Не викам дека нема поединечни мерки кои се добри. Но ви викам, ви тврдам, дека целиот пакет за помош не е вистински и не е доволна помош која му треба на стопанството и на граѓаните“,
рече Мицкоски.
Најмногу критики за мерката за помош на фирмите до 14 500 денари по работник
Најмногу критиките тој упати кон првата владина мерка во пакетот, која предвидува финансиска поддршка за приватните фирми, преку исплата на платите на работниците за април и за мај, во износ од најмногу 14 500 месечно по работник, согласно часовите поминати на работа.
Мицкоски го критикува тоа што мерката не важи и за март бидејќи кризата ги зафати фирмите во текот на овој месец и сопствениците не знаат како да обезбедат плати.
„Она што исто така нема да го слушнете во пресот на Зоран Заев и Оливер Спасовски е следната реченица, а тоа е дека субвенцијата најмногу изнесува 14.500 денари месечно по работник, сразмерно на остварените ефективни часови поминати на работа. Што подразбира ефективен час поминат на работа? Неделно тоа се 40 часа, дневно се 8, а месечно 160 часа. Имајќи предвид дека вонредната состојба ќе трае до средината на април, а најверојатно како што стојат работите, за жал, работите ќе биде продолжено уште за еден месец. Тоа значи дека вработените ќе имаат нула ефективни работни часови во април“,
рече Мицкоски алудирајќи дека тоа значи оти компаниите нема да можат да ја искористат оваа мерка.
Истото, рече тој, ќе биде и во мај ако се продолжи кризата.
Лидерот на ВМРО-ДПМНЕ не се согласува ниту со тоа дека оваа мерка нема да ја користат фирмите кои исплатиле бонуси или награди. Сопствениците, рече Мицкоски, се решиле да ги наградат вработените и затоа што изминатиот период ги слушале премиерот и министрите како велат дека економијата блеска. Во низата критики тој го оспори и тоа што на оваа мерка нема да може да се надеваат компаниите кои веќе се корисници на некоја од мерките преку Агенцијата за вработување, како и оние кои ќе ја завршат 2020 година како позитивна финансиска година ќе треба да ги враќаат парите.
„Ова не се мерки за поддршка во стопанството, ова се мерки кои треба да создадат привид дека некој работел и дека некој смислил мерки за поддршка во стопанството. ВМРО-ДПМНЕ во деновите што следуваат до Владата ќе достави уредби со сила на закон за мерките што ги предлага. Да се отвори дебата на самата владина седница за да може претставникот што ќе биде таму и кој е дел од техничката влада да ги брани тие мерки“,
најави Мицкоски.
Какви мерки предлага лидерот на ВМРО-ДПМНЕ?
Првата мерка, за која најави дека ќе достави и методологија, е да бидат покриени до 50 проценти од трошоците по основ на бруто-плата, не само за април и мај туку и за март и за јуни. Втората, рече, е парите од вториот приватен пензиски столб, кои се предвидени за оваа година, веднаш да се пренасочат во државниот задолжителен пензиски столб. Понатаму, тој предлага и мек трансфер на парите од благајничките записи во државни хартии од вредност, како и итна акција за испорачување на капиталните инвестиции за да има тек на парите.
Во однос на кредитите на граѓаните и фирмите кон банките, тој бара веднаш замрзнување на ратите во период од 3 до 6 месеци.
Мицкоски го поздрави минималецот за функционерите
Мицкоски на неговата прес-конференција го поздрави тоа што Владата одлучи во април и мај сите избрани и именувани функционери да земаат минимална плата.
„Го поздравуваме и укинувањето на додатокот на членовите на совети, на членовите на надзорни одбори на членовите на управни одбори, сè додека кризата не заврши. Но, истовремено, апелираме за намалување и целосна пренамена на средствата што се користат за партиски вработувања од времен карактер, за репрезентации, трошоци со договорни услуги“,
рече Мицкоски.