Сојузот на стопански комори (ССК) се оградува од вториот сет владини мерки што ги соопшти денеска премиерот Оливер Спасовски посочувајќи дека тие барале системски мерки за микро, мали и средни претпријатија погодени од кризата без разлика на дејноста во која работат.
„Наместо тоа, со оваа делумна помош не се постигнува крајната цел, а тоа е да се сочува економијата и да се задржат работниците особено за оние правни лица кои се најмали и незаштитени и на кои овие потреси ќе им го уништат целиот труд да се самовработат и да си ги издржуваат семејствата“,
наведува ССК.
Од Сојузот велат дека на состанокот на Економскиот совет писмено предложиле и конкретни мерки како што се: Владата да одобри поддршка од 100 отсто нето платата за следните три месеци; да ги покрие сите даноци и придонеси на платите за вработените за следните три месеци; фирмите погодени од кризата да не плаќаат аконтација на данок на добивка во цела 2020 година; да се стави мораториум на сите казнени камати и камати на задоцнето плаќање на обврски за следните шест месеци; на вработените кои припаѓаат на групата лекари, трговци и сите кои сега се најоптоварени и под ризик, да им се исплати еднократен бонус.
„Да не се дискриминира по дејност, секој кој е погоден од кризата потребно е да има еднаква можност да аплицира, доколку некој несовесно аплицирал средства, неправилности може да се бараат и истражуваат откако кризата ќе заврши, бидејќи до сега немаше употребливи мерки кои важат за сите правни лица, дел од нив одјавија вработени, не по своја желба или волја туку под притисок од страв за неликвидност и трупање долгови и обврски. Да се отстрани критериумот намален број работници, да не се бара обемна документација која институциите електронски можат да ја добават по службена должност“,
велат од ССК.
Она што досега е објавено во двата пакет економски мерки, тие го оценуваат како недоволни и затоа се оградуваат и инсистираат на барањата кои веќе ги поднеле.
Од Сојузот велат дека неговите членки ги почитуваат мерките за заштита, но и помагаат во справување со кризата, секоја во својот домен.