И за Апасиев е спорно тоа што верификацијата оди преку Верификациската комисија, наместо преку Комисијата за деловнички и мандатно-имунитетни прашања, која не е формирана се уште во новиот собраниски состав
Двајцата пратениците на Левица нема да учествуваат на собраниските седници за верификација на мандати бидејќи, како што соопштија од партијата, сметаат дека процедурата се реализира спротивно на членот 17 од Деловникот на Собранието.
„Според овој член, за да има верификација на нови мандати мора кумулативно да постојат два акта: извештај од ДИК и предлог од Комисијата за деловнички и мандатно-имунитетни прашања (која не постои, односно сѐ уште не е основана). Оваа ‘дива’ верификација во теков на денешниов ден се изведува без вториот потребен документ, а врз основа на т.н. извештај од непостоечката Верификациска комисија на чело со Јагода Шахпаска, која има истечен мандат, односно престана да постои по завршувањето на конститутивната седница. Бидејќи, и покрај процедуралното укажување од страна на нашиот пратеник Димитар Апасиев – дека е правно невозможно без Комисија и без предлог да се продолжи со верификацијата – парламентарното мнозинство продолжи со овој илегален начин на работа, пратениците на Левица нема да учествуваат на фингираните седници на кои ќе бидат ставени на дневен ред овие мандати“,
велат од Левица.
И ВМРО-ДПМНЕ вечерва во неколку наврати реагираше на процедурата за верификување на мандатите на новите пратеници, кои доаѓаат на местата на идните министри. Главната опозициска партија, исто така, се повикува на член 17 од собранискиот Деловник.
Во Собранието вечерва се уште една по една се закажуваат нови седници, за верификација на мандатите на новите пратеници и за констатирање на пратеничките оставки на идните министри. Верификацијата на мандатите е на посебни седници за парламентарното мнозинство да биде сигурно дека во секој момент во салата ќе има најмалку 61 пратеник.
Новите пратеници во текот на викендот ќе учествуваат на новата собраниска седница за избор на новата влада на СДСМ и на ДУИ.