Американскиот претседател, Доналд Трамп, вчера изјави дека следната недела ќе ја прифати републиканската номинација за својот втор мандат за време на говор во Белата куќа, што претходно веќе наиде на критики од демократите за политизација на претседателската резиденција.
Претседателката на Претставничкиот дом, Ненси Пелоси, оцени дека Трамп повторно ќе ја „деградира Белата куќа“ користејќи ја за политички настан.
Трамп тврди дека неговиот план да ја прифати номинацијата во Белата куќа нема да го прекрши Законот од 1939 година, со кој на владините претставници им се забранува да ги користат овластувањата за мешање во исходот од изборите, тврдејќи дека тоа не важи за претседателот.
Пандемијата на коронавирусот ги принуди демократите и републиканците да ги преиспитаат одржувањата на нивните национални конвенции. Наместо митинг предвиден за Милвоки, демократите неделава закажаа четири вечери со виртуелни говори и настани.