Според него, локацијата, заедно со поврзувањето на постојната болница „8 Септември“, ПЕТ-центарот и поликлиниката „Букурешт“, ќе овозможи создавање на интегриран здравствен комплекс
Премиерот Христијан Мицкоски очекува до крајот на годинава да завршат преговорите за локација на новиот клиники центар во Скопје, во близина на спортскиот центар „Борис Трајковски“.
На денешната промоција на 100 нови амбулантни возила, одржана на паркингот во близина на салата „Борис Трајковски“, премиерот рече дека се наоѓаат меѓу двете парцели што ги разгледуваат и за кои преговараат за локација на новиот Клинички центар.
„Едната парцела е пред базенот, кој беше оставен пред забот на времето, па сега се реконструира, а другата е зад тобоганот. Тоа се двете парцели каде што би требало да биде новиот Клинички центар. Очекувам до крајот на оваа година и тие преговори да ги завршиме“,
рече Мицкоски.
Според него, локацијата, заедно со поврзувањето на постојната болница „8 Септември“, ПЕТ-центарот и поликлиниката „Букурешт“, ќе овозможи создавање на интегриран здравствен комплекс.
Со Општина Карпош, како што додаде, се работи и на обезбедување дополнителни паркинг-места, со цел да се намали сообраќајниот метеж што би настанал по изградбата и ставањето во функција на комплексот.
„Затоа, планираме уште сега ако да го растовариме тој дел од предизвиците со кои ќе се соочат жителите на овој дел од градот“,
кажа премиерот.