„Фич“, како што велат од опозициската партија, не му напиша пофалница на Мицкоски за животниот стандард, туку како и претходно укажува на предизвици како што се фискалниот дефицит, ниската продуктивност и демографските промени
Од опозицискиот Социјалдемократски сојуз (СДСМ) денеска соопштија дека премиерот Христијан Мицкоски повторно манипулира со статистика, посочувајќи дека агенцијата „Фич“ не кажала оти граѓаните живеат подобро.
Оттаму велат дека Мицкоски повторно слави бројка што не се мрднала.
„Во 2024 година кредитниот рејтинг на државата беше ВВ+, а ВВ+ останува и во 2026 година. Тоа не е напредок. Тоа е исто“,
се вели во партиското соопштение.
Сепак, според СДСМ, Мицкоски тоа го претставува како успех и како доказ дека денес граѓаните живеат подобро.
„Лаже уште додека ја чита оценката. Што значи оценката ВВ+ на јазик што не го разбора секој? Нема инвестициски рејтинг. Инвестицискиот почнува со ВВВ, а државата и натаму останува под тоа ниво. Државата и натаму се смета за ризична, зашто сè уште не сме дел од ЕУ, зашто Мицкоски не ги спроведува потребните реформи“,
велат од СДСМ.
„Фич“, како што велат од СДСМ, не му напиша пофалница на Мицкоски за животниот стандард, туку како и претходно укажува на предизвици како што се фискалниот дефицит, ниската продуктивност и демографските промени.
„Државата трпи повеќе отколку што собира. Работи помналку вредност отколку што треба. Луѓето си одат. Тоа не е економски тигар. Тоа е предупредување во фуснота, а арамијата го чита како химна“,
додаваат оттаму.
И најважно, како што се посочува во соопштението, оваа оценка не кажува ништо за секојдневниот живот на граѓаните. Таа не ја мери потрошувачката кошничка, цената на горивата, кириите или минималната плата. Не кажува колку чини храната во маркетите и дали платата е доволна да ги покрие месечните трошоци.
„Граѓаните не живеат во извештајот на ‘Фич‘. Живеат со цени до плафон во продавница, маркет, пазар. Таму цената оди нагоре. Горивото јаде плата. Поскапувањата не чекаат рејтинг. Минималната плата не расте. А најсилниот показател не е ни БДП, ни ВВ+, туку празни фрижидери и празни паричници. Подобар показател од тоа нема“,
пишува во партиското соопштение.
Оттаму порачаа и дека кога Мицкоски вели оти денес се живее многу подобро отколку пред три години, граѓаните наместо во „Фич“, треба да поглоеднат во своите сметки и трошоци.
„Ако оценката е иста како и во 2024 година, а кошницата е потешка, лагата е очигледна. Арамијата штом зине – лаже“,
велат од СДСМ.
Премиерот Христијан Мицкоски вчера рече дека позитивните оценки за македонската економија од реномираните меѓународни институции ги демантираат наводите на опозицијата за наводен банкрот на државата. Во таа насока, вели оти потврдувањето на кредитниот рејтинг од страна на „Фич“ е уште една лоша вест за опозицијата којашто тажи и жали зашто Македонија оди напред.
„Три години водат кампања дека секоја година само што не сме банкротирале, буџетот бил без пари, економијата назадувала и така натаму. Одговорите стигаат од сите страни, од Светска банка, од Меѓународниот монетарен фонд, еве и од сега од реномирани кредитни агенции како што е ‘Фич‘“,
рече премиерот.
Министерката за финансии Гордана Димитриеска-Кочоска вчера на социјалните мрежи напиша дека потврдувањето на кредитниот рејтинг на државата од страна на агенцијата „Фич“ претставува силна потврда за конзистентноста на владините политики и јасен сигнал за продолжување по истиот пат.
Според неа, ефектите од овие заложби се јасно видливи низ конкретните економски показатели кои претставуваат главен фактор за задржување на рејтингот.