Украинскиот претседател Володимир Зеленски изјави дека дронот бил насочен директно кон канцеларијата на шефот на СБУ, Олександр Поклад, во зградата, кој според информациите се наоѓа на безбедно и не е повреден во нападот
Украинските власти соопштија дека во нападот се повредени 12 лица и оти службите за итни случаи се на местото на настанот
Руските сили во напад со дрон среде бел ден го погодија седиштето на Украинската безбедносна служба (СБУ) во Киев, јавуваат светските медиуми, од кои дел пренесуваат дека црни облаци чад се издигаат во срцето на главниот град на земјата.
Како што објави американската телевизија Си-ен-ен, ова е првпат заградата на СБУ да биде погодена во руски воздушен напад во конфликтот што трае четири и пол години. Нападот врз една од клучните владини згради во Киев доаѓа по денови речиси континуирани воздушни напади од страна на Русија врз украинскиот главен град.
Директниот удар на дронот врз објектот на безбедносната служба, според телевизијата, меѓу другото, укажува и на сериозниот недостаток на Украина од муниција за противвоздушна одбрана.
Украинските власти соопштија дека во нападот се повредени 12 лица и оти службите за итни случаи се на местото на настанот.
Претседателот на Украина, Володимир Зеленски, изјави дека дронот бил насочен директно кон канцеларијата на шефот на СБУ, Олександр Поклад, во зградата. Од Украинската безбедносна служба подоцна соопштија дека Поклад се наоѓа на безбедно и не е повреден во нападот.
Зеленски соопшти дека ѝ наложил на СБУ да достави план за „соодветен и конкретен одговор“ кон Русија, кој, таму каде што е можно, ќе го преслика денешниот удар врз Киев.
„Нашата војска ќе го поддржи овој одговор“,
рече Зеленски.
Инаку, Киев изминатите осум дена се соочи со серија руски напади, во кои беа погодени повеќе згради во градот, меѓу кои и магацини и фабрики, вклучувајќи и производствен погон на „Кока-кола“.
Во речиси непрекинатите напади, кои траат од минатиот месец, најмалку 53 лица беа убиени, а 134 повредени во главниот град на Украина и поширокиот регион.
Сепак, нападот врз седиштето на Украинската безбедносна служна означува голема ескалација во војната, бидејќи станува збор за еден од клучните владини објекти.
A Russian drone has struck Ukraine’s domestic intelligence headquarters in central Kyiv, injuring five people.
— Al Jazeera English (@AJEnglish) September 4, 2026
President Volodymyr Zelenskyy says it directly targeted the agency chief’s office and has ordered a response, as Ukraine presses NATO allies for more air defences. pic.twitter.com/J5uJaiCSmT
Повеќето од нападите во последните неколку дена беа извршени со млазни беспилотни летала, а денешниот, како и претходните удари, е знак дека Киев нема доволно пресретнувачки ракети за да се одбрани од руските напади.
Според анализите на Си-ен-ен, руските дронови летаат со брзина до 500 километри на час и успеваат да ја избегнат противвоздушната одбрана на Украина. Тие се, исто така, премногу брзи и за мобилните одбранбени тимови на Киев, поради што единствен начин да бидат соборени е со ракети земја-воздух или со борбени авиони, воени ресурси од кои Украина има исклучително ограничени залихи.
Инаку, руските сили претходно гаѓаа објекти на украинската влада и успеаја да погодат некои од нив, но никогаш не погодиле цел од толку голема важност, и тоа преку ден.
Украинскиот министер за надворешни работи Андриј Сибиха изјави дека денешниот напад бара решителен одговор.
„Москва го започна овој напад за време на обновениот притисок за мир – откривајќи го своето вистинско отфрлање на дипломатијата. Ги повикуваме меѓународните партнери недвосмислено да ги осудат овие дејства и да го засилат притисокот врз режимот на Путин“,
рече Сибиха, посочувајќи дека американските специјални пратеници Стив Виткоф и Џаред Кушнер планираат да ги посетат Москва и Киев во наредните денови.
СБУ е агенција за внатрешна безбедност на Украина, која по својот опис на работата е слична со Федералното истражно биро (ФБИ) во САД и МИ 5 во Велика Британија.
Зградата на агенцијата се наоѓа во срцето на историскиот Киев, преку улицата од катедралата „Света Софија“, која е заштитена од УНЕСКО, и веднаш до две други знаменитости – Златната порта и Националната опера.
Инаку, денеска во официјална посета на Киев е шефот на македонската дипломатија Тимчо Муцунски, кој имаше средба и прес-конференција со неговиот украински колега Андриј Сибиха.