Шефот на македонската дипломатија на средбата со својот украински колега ја потврдил подготвеноста на Република Северна Македонија да продолжи да придонесува кон меѓународните напори за поддршка на Украина и активно вклучување на земјава во процесот на нејзино закрепнување и реконструкција
Стоиме со Украина, која е суверена држава и нејзиниот територијален интегритет мора да се почитува. Границите не можат да се менуваат со сила. Ова го истакна шефот на македонската дипломатија Тимчо Муцунски по средбата со неговиот украински колега, Андриј Сибиха, денеска во Киев.
Како што соопштија од Министерството за надворешни работи и надворешена трговија на земјва, министерот Муцунски денеска престојува во официјална посета на Украина, во рамките на која се сретнал со неговиот колега, Андриј Сибиха.
Од фотографиите што ги сподели Министерството, може да се види дека Муцунски и Сибиха имале заедничка прес-конференција.
Според соопштението, но и како што сподели Муцунски на социјалните мрежи, во фокусот на разговорите со украинскиот министер за надворешни работи биле можностите за натамошно продлабочување на политичкиот дијалог и соработката меѓу двете земји, како на билатерален, така и на мултилатералне план.
Посебен акцент бил ставен на унапредувањето на економската соработка, европската перспектива на двете земји и актуелните безбедносни прашања. Станало збор и за можностите за учество на нашата држава во процесот на закрепнување и реконструкција на Украина.
Шефот на македонската дипломатија ја потврдил, како што се наведува, цврстата и континуирана поддршка за Украина. Во тој контекст, Муцунски ја нагласил принципиелната позиција на земјава во однос на почитувањето на суверенитетот, територијалниот интегритет и меѓународното право.
„Стоиме со Украина. Украина е суверена држава. Нејзиниот територијален интегритет мора да се почитува. Границите не можат да се менуваат со сила. А меѓународното право не може да биде прашање на избор кога неговото почитување не ни одговара“,
истакнал Муцунски.
На средбата со Сибиха било нагласено и поширокото значење на безбедноста на Украина за европската и трансатлантската безбедност. Во таа насока соговорниците посочиле на потребата од заеднички и координиран ангажман на сојузниците и партнерите во создавањето услови за постигнување праведен и траен мир.
Муцунски ,во тој контекст, нагласил дека лидерството на Соединетите Американски Држави и европската одговорност мора да дејствуваат заедно.
„Така го зајакнуваме одвраќањето денес. Така ги создаваме условите за мир утре. И така обезбедуваме тој мир да биде траен“,
порачал министерот за надворешни работи и надворешна трговија на земјава.
Тој ја потврдил и подготвеноста на Република Северна Македонија да продолжи да придонесува кон меѓународните напори за поддршка на Украина и активно вклучување на земјава во процесот на нејзино закрепнување и реконструкција.
„Кога разговорот повеќе нема да биде за одбрана и преживување, туку за обнова и просперитет. Сакаме тој ден да дојде што е можно поскоро. И кога ќе дојде, мојата држава има намера да биде тука – не само како пријател кој стоел со Украина во тешките времиња, туку и како партнер во нејзиното закрепнување и реконструкција“,
нагласил Муцунски.
Двајцата министри ја потврдиле подготвеноста за натамошно продлабочување на билатералната и мултилатералната соработка, како и за унапредување на политичките и економските односи меѓу двете земји.
Во рамките на посетата, министерот Муцунски остварил средба и со Олександр Корниенко, прв заменик-претседател на Врховната рада на Украина, а заедно со министерот Сибиха положиле цвеќе пред Ѕидот на сеќавањето на паднатите бранители на Украина.
Муцунски во објавата на Фејсбук за денешната официјална посета на Украина напиша дека тоа била една од организациски најсложените, но и најзначајни посети.
Патот, вели тој, траел повеќе до 20 часа – со авион, воз и автомобил.