Претседателот на СДСМ рече и оти премиерот Христијан Мицкоски користи навреди и закани за да го сокрие падот на животниот стандард, а неговото извинување го нарече изнуден привид направен во празна сала
Претседателот на СДСМ, Венко Филипче, на денешната прес-конференција во партиското седиште се осврна на однесувањето на премиерот Христијан Мицкоски и вчерашните случувања во Собранието, нарекувајќи го очаен политички театар кој има единствена цел да го прикрие целосниот неуспех на Владата, отсуството на какви било резултати во нејзиното функционирање, но и обид за создавање алиби за евентуални предвремени избори.
Тој кажа и дека во услови кога економијата стагнира, цените растат, а животниот стандард на граѓаните паѓа, премиерот наместо реални решенија избира да користи закани и агресија.
„Граѓаните ги нарекува талог на општеството, глодари, медиокритети, мекотели, секакви погрдни зборови избираше во изминатиот период, а сега почна да ги навредува и пратениците во Собранието. При тоа, навредите многу повеќе кажуваат за него, отколку што кажуваат за било што друго. Тоа ли е универзитетски професор? Тоа ли е премиер, претседател на влада?“,
изјави Филипче.
Во однос на извинувањето на премиерот, Венко Филипче го нарече срамежливо, изнудено и целосно неискрено, кое намерно се случило во празна сала откако опозициските пратеници веќе ја напуштиле седницата, со што Мицкоски се обидел да создаде лажен привид пред јавноста оти презема одговорност.
„Вистинското извинување подразбира признавање на грешката, менување на начинот на однесување и санкции. Граѓаните заслужуваат почит, достоинство и пример кој обединува, а не човек кој ги дели и навредува“,
рече претседателот на СДСМ.
Филипче кажа дека никој не му се плаши на Христијан Мицкоски и дека ваквиот начин на комуникација не е приказ на моќ, туку е само одраз на неговата слабост и политичка неспособност.