Од Демократската унија за интеграција порачуваат дека ќе продолжат да ја осудуваат секоја намера за деградирање на правата на Албанците и секое прекршување на законот што ја гарантира јазичната еднаквост во државата
Демократската унија за интеграција (ДУИ) преку соопштение изрази длабока загриженост поради, како што велат, флагрантното кршење на Законот за употреба на јазиците од страна на новата влада, за која тврдат дека нема етнички легитимитет.
Како пример за ова, од ДУИ го посочуваат вчерашниот случај во кој министерот за здравство Азир Алиу промовирал натпис во рамките на еден оддел на Институтот за јавно здравје, кој бил испишан само на македонски јазик. Според опозициската партија, овој чин претставува јасен доказ за потценување на албанскиот јазик и грубо кршење на важечкиот закон.
Од партијата прават паралела со периодот кога тие биле дел од извршната власт, посочувајќи дека во истата институција натписите биле поставени двојазично, односно во согласност со законот и во духот на институционалната еднаквост. Како поткрепа на овие тврдења, ДУИ достави и фотографии со кои ја прикажува разликата во означувањето на институциите тогаш и сега.
„ДУИ потсетува дека Законот за употреба на јазиците е јасен и задолжителен: натписите во јавните институции мора да бидат и на албански јазик“,
велат од партијата.
Во реакцијата ДУИ упати и критики до албанските партнери во владината коалиција, Влен, нарекувајќи ги „вазали“. Од партијата прашуваат уште колку пати треба да се прекрши правото на употреба на албанскиот јазик за тие да престанат да аплаудираат и да реагираат, додавајќи дека нивното молчење претставува соучесништво во деградирањето на правата на Албанците.
Од Демократската унија за интеграција порачуваат дека ќе продолжат да ја осудуваат секоја намера за деградирање на правата на Албанците и секое прекршување на законот што ја гарантира јазичната еднаквост во државата.