Од опозициската партија порачуваат дека нивниот тим е подготвен за отворена дебата која ќе се темели на бројки, а не на, како што велат, политички конструкции
Претседателот на СДСМ, Венко Филипче, го прифати повикот на министерката за финансии Гордана Димитриеска-Кочоска за средба во Министерството, но побара таа да биде целосно отворена за јавноста и на неа да присуствуваат медиумите со амери.
Ваквата реакција доаѓа по јавната покана на министерката до економскиот тим на опозицијата со цел да се соочат економските аргументи и бројки.
Филипче, преку објава на неговиот профил на Икс, нагласи дека опозицијата е подготвена за директно соочување, но инсистира на целосна транспарентност пред граѓаните.
„Добро. Доаѓаме. Но, да дојдат и медиумите со камери. Отворете ги вратите широко, нека слушаат и нека гледаат граѓаните. Нека ни објасни како 1+2=5, како што објаснуваше дека половина Европа ќе банкротира, а Македонија ќе стане богата“,
напиша лидерот на СДСМ.
Министерката Кочовска нè повикува на средба за „убаво да ги објасниме работите“.
— Venko Filipce (@VFilipche) May 23, 2026
Добро. Доаѓаме.
Но да дојдат и медиумите со камери.
Отворете ги вратите широко, нека слушаат и нека гледаат граѓаните.
Нека ни објасни како 1 + 2 = 5, како што објаснуваше дека половина Европа…
Од опозициската партија порачуваат дека нивниот тим е подготвен за отворена дебата која ќе се темели на бројки, а не на, како што велат, политички конструкции.
Според Филипче, јавноста мора да ја дознае вистината за состојбата со јавните финансии, обвинувајќи ја власта дека бара „ново алиби за катастрофалното водење на финансиите“.
Инаку, денеска Филипче на прес-конференција рече дека буџетот е пред колапс и нема пари за повисоки плати, пензии и антикризни мерки. Тој ја оцени состојбата во економијата како сериозно влошена и ја обвини Владата предводена од Христијан Мицкоски дека не успеала да обезбеди подобар животен стандард за граѓаните.
По ова министерката за финансии, Гордана Димитриеска-Кочоска преку објава на Фејсбук го повика економскиот тим на опозициската СДСМ на заедничка средба во Министерството, со цел, како што вели, да се разјаснат економските состојби со реални бројки, наспроти „хистеричните прес-конференции полни со невистини“.
Според министерката, опозицијата изнесува погрешни толкувања и паника во јавноста, иако официјалните економски показатели покажуваат стабилност и раст.