Тој додава оти неговата партија не преговара за фотелји и позиции, туку зборува за иднината на Македонија во Европската Унија
„Каква широка влада? Кој зборувал за влада и коалиција?“ Вака денеска лидерот на СДСМ коментира откако на неговата вчерашна прес-конференција го повика премиерот Христијан Мицкоски на заедничко преземање на одговорноста за уставните измени заради иднината на младите и државата, што од одредени медиуми беше протолкувано како повик за широка влада.
„Јасно кажав – поддршка за европските интеграции и реформите. Да влеземе во тендер-коалицијата на Мицкоски? Од каде некому му падна на памет таква идеја?“,
напиша Филипче во објава на Икс.
Тој додава оти неговата партија не преговара за фотелји и позиции, туку зборува за иднината на Македонија во Европската Унија.
„Реформи сега. Малцинства во Уставот сега. Европа сега“,
додава Филипче.
Каква широка влада? Кој зборувал за влада и коалиција?
— Venko Filipce (@VFilipche) May 22, 2026
Јасно кажав – поддршка за европските интеграции и реформите.
Да влеземе во тендер коалицијата на Мицкоски?
Од каде некому му падна на памет таква идеја?
Ние не преговараме за фотелји и позиции.
Ние зборуваме за иднината… pic.twitter.com/tsaF9sEhf5
Филипче вчера упати апел до Мицкоски за заеднички да ја преземат одговорноста и да ја споделуваат одговорноста за спроведување на уставните измени и за текот на преговори и за каков било предизвик.
„Да не го испуштиме моментот. Ќе останеме надвор од сите процеси. Ќе останеме слепо црево на Балканот. Ќе останеме без буџети. Нема да имаме од што да преживееме овде во државата. Младите сите ќе заминат оттука ако запре овој процес вака“,
рече Филипче.
Тој нагласи дека сите политички чинители треба заеднички да работат на процесот на евроинтеграции и додаде дека не постои ризик за македонскиот идентитет.
Вчерашната изјава на Филипче дојде откако германскиот канцелар Фридрих Мерц во писмо до лидерите на Европската Унија повикува на иновативни решенија за забрзување на процесот на проширување ставајќи посебен фокус на Украина, но и на земјите од Западен Балкан и Молдавија.
Предлогот на Мерц се испраќа само неколку недели пред Самитот на Западен Балкан во Црна Гора на почетокот на јуни.
Во писмото Мерц предлага нова динамика на пристапување во ЕУ за сегашните кандидати – Украина, земјите од Западен Балкан и Молдавија. Ова, како што пишува, е поради тоа што проширувањето на Европската Унија е геополитичка неопходност, но и процес што трае премногу долго.
Според Филипче, уште еден јасен сигнал дека проширувањето повторно е високо на агендата на Унијата е и најавената посета на претседателот на Европскиот Совет, Антонио Кошта, во Македонија, која ќе се реализира непосредно пред Самитот за Западен Балкан во Подгорица.
Филипче вели дека актуелниот геополитички момент претставува една од најважните можности за државата да го продолжи европскиот пат и да стане дел од процесот на новото проширување на Европската Унија.