На местото на несреќата, како што велат од МВР, животот го загубиле возачот на автомобилот, Р.В. и сопатниците А.В. (20) и П.М. (20) од Скопје, како и уште едно лице чиј идентитет сè уште не е утврден
Четири лица го загубија животот во тешката сообраќајна несреќа што се случи синоќа на скопската обиколница, во која учествуваа камион и патничко возило, потврдуваат од Министерството за внатрешни работи.
Според информациите од МВР, несреќата била пријавена синоќа во 23 часот. Трагедијата се случила на потегот помеѓу надвозникот кај Визбегово и клучката Мирковци.
Возачот Б.Б. (76) од Косово, управувајќи камион „ман“ со полуприколка со косовски таблички, изгубил контрола врз возилото, ја пробил заштитната метална ограда и преминал во спротивната лента на автопатот. Таму директно се судрил со автомобил „бе-ем-ве“ со скопски регистарски ознаки, управувано од 51-годишниот Р.В. од Скопје.
Од ударот избил пожар во двете возила, а автомобилот и кабината на камионот целосно изгореле.
На местото на несреќата, како што велат од МВР, животот го загубиле возачот на автомобилот, Р.В., и сопатниците А.В. (20) и П.М. (20) од Скопје, како и уште едно лице чиј идентитет сè уште не е утврден.
Лекар од Итната медицинска помош само ја констатирал смртта кај четирите лица, а по наредба на јавен обвинител телата се предадени на обдукција.
Возачот на камионот, 76-годишниот Б.Б., по наредба на обвинител е лишен од слобода и задржан во полициска станица за понатамошна истрага.
Од МВР велат дека по целосно документирање на случајот полицијата ќе поднесе соодветна кривична пријава.
Поради вршење на увидот, сообраќајот повеќе од шест часа беше во прекин и се пренасочуваше на патниот правец Тетово-Велес, кај клучка Приштина кон селото Визбегово, и Велес-Тетово кај клучка Мирковци.
Сообраќајот на обиколницата е целосно нормализиран утрово во 5 часот.