Овој отворен ултиматум до Иран доаѓа и само неколку часа откако Трамп објави фотографија генерирана од вештачка интелигенција, на која се гледа како стои на американски воен брод покрај адмирал на американската морнарица, опкружен со бурно море и молњи, а ирански бродови се видливи во позадина
Тој вчера објави и видео во кое е прикажана симулирана сцена на воен напад врз ирански авион
Американскиот претседател Доналд Трамп повторно ја заостри својата реторика кон Техеран. На неговата социјална мрежа Трут соушл објави нова директна воена закана кон Иран, предупредувајќи дека времето истекува и дека земјата треба брзо да реагира оти во спротивно нема ништо да остане од нив.
„Часовникот отчукува за Иран и подобро е да дејствуваат брзо или нема ништо да остане од нив. Времето е од суштинско значење!“,
напиша Трамп.
Ова негова порака, како што анализираат светските медиуми, доаѓа веднаш по враќањето од посетата на Пекинг, сигнализирајќи дека дипломатските обиди за решавање на кризата во Ормускиот Теснец се во целосен ќорсокак.
Овој отворен ултиматум до Иран доаѓа и само неколку часа откако Трамп објави фотографија генерирана од вештачка интелигенција, на која се гледа како стои на американски воен брод покрај адмирал на американската морнарица, опкружен со бурно море и молњи, а ирански бродови се видливи во позадина.
Фотографијата е опишана со зборовите:
„Затишје пред бура“.
Голем дел од светските медиуми ја протолкуваа како директно предупредување до Техеран и најава за можно продолжување на воздушните напади на САД.
Трамп вчера објави и видео во кое е прикажана симулирана сцена на воен напад врз ирански авион.
Во видеото е прикажан американски разурнувач кој соборува авион со иранско знаме, додека во аголот на екранот се појавува и Трамп, кој во клипот изговара:
„Добро, го имаме на нишан. Оган-пукај“.
Серијата агресивни пораки што во краток временски период ги испрати Трамп, според аналитичарите, се директен притисок врз иранското раководство, но и подготовка на американската јавност за евентуалното пропаѓање на прекинот на огнот што стапи на сила на 7 април.
Според „Њујорк тајмс“, соработниците на Трамп веќе изготвија оперативни планови за враќање на воздушните напади доколку Белата куќа одлучи да го прекине сегашниот застој. Пентагон брзо планира опции за продолжување на голема воена операција.
Како што анализираат дел од медиумите, САД и Израел ги спроведуваат најголемите логистички подготовки откако е прогласен прекинот на огнот, а потенцијалните напади би можеле да започнат уште следната недела.
Минатата недела, Трамп ја отфрли најновата мировна понуда на Иран, оценувајќи ја како неприфатлива.