Министерката за образование и наука Весна Јаневска денеска учествуваше на научната конференција „Креирај дома, продавај глобално“, на која изјави дека државата треба повеќе да вложува во вештачката интелигенција и да ја користи за забрзување на технолошкиот развој
Мора да вложуваме повеќе во вештачката интелигенција (ВИ). Ова го изјави денеска министерката за образование и наука Весна Јаневска која присуствуваше на научната конференција „Креирај дома, продавај глобално“ со која се означи отворањето на „Технолошки парк – Н99“ на универзитетот ФОН.
Јаневска посочи дека вештачката интелигенција веќе не е само иднина и дека државата мора да вложува повеќе и да ја користи ВИ за ефектуирање на сите процеси, за побрзи иновации и за забрзување на технолошкиот развој.
„Бидејќи, ако не го правиме тоа, ние ќе заостанеме, ќе останеме изолирани и заборавени од светот. Мора да држиме чекор со она што се случува во светот“,
рече Јаневска.
Министерката потенцира дека научно-технолошките паркови и истражувачките центри се клучна алка во поврзувањето на образованието, науката и бизнис-секторот.
„Владата е влезена во еден мегапроект за основање на првиот државен научно-технолошки парк, а само здравата конкуренција ќе обезбеди побрз и подобар прогрес. Па така, со заеднички сили, ќе одиме, се надевам, многу брзо напред, затоа што тоа ни е неопходно“,
додаде Јаневска.
На конференцијата беше претставен хуманоидниот робот Алшар, чиј креатор е Анис Сефиданис, професор на Универзитет „Свети Апостол Павле“ во Охрид.