Второпласирана е партијата ГЕРБ-СДС со освоени 39 мандати. Следна е коалицијата „Продолжуваме со промената – Демократска Бугарија“ со 37 пратеници, а по неа следува Движењето за права и слободи – ДПС со освоени 21 мандат. Петтиот политички субјект што влегува во парламентот на Бугарија е партијата Преродба со освоени 12 пратенички места
Централната изборна комисија (ЦИК) на Бугарија денеска ја објави распределбата на мандатите во Народното собрание по парламентарните избори одржани на 19 април.
Според резултатите од гласањето, новоформираната партија Прогресивна Бугарија на поранешниот бугарски претседател Румен Радев освои најголем број пратеници – вкупно 131, што значи дека има апсолутно мнозинство во 240-члениот парламент и можност самостојно да формира влада.
Второпласирана, според бројот на освоени гласови на изборите, е партијата ГЕРБ-СДС со освоени 39 мандати. Следна е коалицијата „Продолжуваме со промената – Демократска Бугарија“ со 37 пратеници, а по неа следува Движењето за права и слободи – ДПС со освоени 21 мандат. Петтиот политички субјект што влегува во парламентот на Бугарија е партијата Преродба со освоени 12 пратенички места.
ЦИК на Бугарија в сабота ќе го објави списокот со имиња на пратениците во новиот парламентарен состав, а првата седница на Народното собрание, според најавите, ќе биде свикана во текот на следната недела.
Според податоците на Централната изборна комисија, излезеноста на изборите во неделата изнесува 51,11 отсто што, како што анализираат локалните медиуми, е рекордна во последните пет години. Од вкупно 6 627 747 граѓани со право на глас, на гласање излегле 3 360 330 граѓани. Бројот на неважечки гласачки ливчиња изнесува 19 233.