Неговата изјава следи откако Туристичката комора при Сојузот на стопански комори на Македонија (ССКМ) упати барање до грчкото Министерство за туризам за привремено одложување на примената на новиот систем за влез и излез (ЕЕС) на граничните премини за македонските државјани во текот на летната сезона
Слично барање веќе поднесе и Србија, охрабрена од одлуката на грчката влада привремено да ја суспендира биометриската контрола за државјаните на Велика Британија, со цел намалување на метежот на граничните премини и аеродромите во екот на туристичката сезона
Вицепремиерот и министер за транспорт Александар Николоски денеска во одговор на новинарско прашање изјави дека нема да го следи примерот на соседните земји кои јавно бараат суспензија на биометриските проверки на грчките граници во текот на летната сезона.
„Ова, покрај технички, се и политички прашања. Во вакви прашања секогаш целта ми е да ја завршиме работата, а не од тоа да правиме политика или маркетинг. Јас нема да го правам она што го прават колегите од соседните држави затоа што на тој начин го уништуваат процесот. И еве ќе застанам тука“,
рече тој пред работниот состанок посветен на активностите и плановите за проектите на Коридорот 8, кој се одржува во соработка со претставници на Делегацијата на Европската Унија во Скопје.
Неговата изјава следи откако Туристичката комора при Сојузот на стопански комори на Македонија (ССКМ) упати барање до грчкото Министерство за туризам за привремено одложување на примената на новиот систем за влез и излез (ЕЕС) на граничните премини за македонските државјани во текот на летната сезона.
Во официјално обраќање до Министерството за туризам на Република Грција, Комората бара системот да не се применува во периодот од 1 јуни до 1 септември 2026 година.
Барањето доаѓа по реакциите и укажувањата од туристичкиот сектор во земјава, од каде што се предупредува дека примената на системот во шпицот на сезоната може да предизвика значителни задржувања на граничните премини и чекања од повеќе часови.
Инаку, слично барање веќе поднесе и Србија, охрабрена од одлуката на грчката влада привремено да ја суспендира биометриската контрола за државјаните на Велика Британија, со цел намалување на метежот на граничните премини и аеродромите во екот на туристичката сезона.
Грција привремено ги ослободи британските државјани од биометриската регистрација при влез во земјата, кои на аеродромите и пристаништата нема да мора да даваат отпечатоци од прсти ниту скенирање на лице. Одлуката доаѓа во пресрет на летната туристичка сезона, кога новиот систем за влез и излез веќе создаде долги редици и доцнења на повеќе европски гранични премини и аеродроми.
Грчките власти се решиле на пофлексибилен пристап за британските патници за да го олеснат приливот на туристи и да избегнат дополнителен притисок врз инфраструктурата, особено на островските аеродроми.
Новиот систем – ЕЕС (entry/exit system) од 10 април целосно се применува на надворешните граници на Европската Унија (ЕУ), а предвидува дигитално регистрирање при влез и при излез на граѓаните од земјите што не се членки на Унијата, наместо досегашното рачно евидентирање на пасошите со ставање печат.
Предвидено е системот ЕЕС (EES) да ги бележи точните датуми на влез и на излез и да врши автоматска проверка на правилото за дозволен престој од 90 дена во рамките на 180 дена, со што ќе се намалат можностите за негово прекршување.