Иранската војска соопшти дека контролата врз теснецот е повторно засилена, додавајќи дека преминот на бродови ќе биде под строг надзор сè додека, како што наведуваат, продолжува американската поморска блокада
Иран повторно воведе ограничувања за премин на бродови низ Ормускиот Теснец, обвинувајќи ги Соединетите Американски Држави (САД) за повторени прекршувања на довербата во рамките на договорениот прекин на огнот, пренесува Си-ен-ен.
Иранската војска соопшти дека контролата врз теснецот е повторно засилена, додавајќи дека преминот на бродови ќе биде под строг надзор сè додека, како што наведуваат, продолжува американската поморска блокада.
Иранскиот министер за надворешни работи Абас Арагчи вчера објави дека теснецот е отворен за сообраќај, но неколку часа подоцна државните медиуми информираа за повторно воведување на ограничувањата.
Портпарол на иранската војска изјави дека на одреден број нафтени танкери и комерцијални бродови им е дозволено да поминат, но ја обвини американската страна за, како што рече, пиратство и поморски кражби под изговор на блокада.
„Но, за жал, Американците, со нивните повторени прекршувања на довербата, продолжуваат да се занимаваат со пиратство и поморски кражби под таканаречената титула за блокада“,
рече тој.
Во меѓувреме, американскиот претседател Доналд Трамп останува на ставот дека блокадата на иранските пристаништа ќе продолжи сè додека не се постигне целосен договор со Техеран.
„Можеби нема да го продолжам, но блокадата (на иранските пристаништа) ќе остане“,
им рече Трамп на новинарите на авионот „Ер форс уан“ на враќање кон Вашингтон од Феникс, Аризона.
Засега нема информации кога би можела да се одржи нова рунда разговори меѓу двете страни, откако преговорите во Исламабад минатиот викенд не дадоа резултат.