Израелскиот Кнесет вчера гласаше за разгледување на два закона насочени кон проширување на израелскиот суверенитет на окупираниот Западен Брег за време на посетата на американскиот потпретседател Џеј-Ди Венс на земјата
Американскиот државен секретар Марко Рубио, предупреди дека одобрувањето на закон за проширување на израелскиот суверенитет на Западниот Брег од страна на израелскиот парламент, потег што е еднаков на анексија на територии што Палестинците ги сакаат за своја држава, би можело да го загрози прекинот на огнот во Појасот Газа.
„Мислам дека претседателот (Доналд Трамп) јасно кажа дека ова е нешто што не можеме да го поддржиме во овој момент“,
изјави Рубио пред новинарите пред неговото патување во Израел, каде што се очекува да пристигне денеска, додавајќи дека тоа би го загрозило примирјето и би било контрапродуктивно.
Израелскиот Кнесет вчера гласаше за разгледување на два закона насочени кон проширување на израелскиот суверенитет на окупираниот Западен Брег за време на посетата на американскиот потпретседател Џеј-Ди Венс на земјата.
Американскиот претседател Доналд Трамп, сојузник на Израел во неговата војна против исламистичкото движење Хамас, се спротивставува на каква било израелска анексија на Западниот Брег, што е поддржано од израелската крајна десница.
Израелските парламентарци гласаа за два законски предлози во прелиминарното читање, што овозможи нивно разгледување во прво читање.
Во август, Израел одобри клучен проект за изградба на 3 400 станбени единици на Западниот Брег, што беше осудено од Обединетите нации и неколку шефови на држави.
„Ова е демократија, тие ќе гласаат. Но, во овој момент, тоа е нешто што сметаме дека би било контрапродуктивно“,
рече Рубио.
Запрашан за зголемувањето на екстремистичкото насилство на израелските доселеници врз Палестинците на Западниот Брег, Рубио одговори:
„Загрижени сме за сè што се заканува да ги дестабилизира плодовите на нашите напори“.
Рубио патува во Израел веднаш по потпретседателот Венс, кој изрази оптимизам за одржување на договорот за прекин на огнот меѓу Израел и Хамас.
Договорот, кој стапи на сила на 10 октомври и се базира на мировниот план на Трамп, беше загрозен во неделата по смртоносното насилство во Газа и меѓусебните обвинувања од страна на Израел и Хамас за негово кршење.
„Ќе има закани секој ден, но всушност мислам дека сме побрзи од планираното кога станува збор за имплементација, а фактот дека го преживеавме овој викенд е добар знак“,
рече Венс.