fbpx
Свет

Неколкумина приведени за време на полициската акција во Белград за отстранување на блокадите

360степени | 30 јуни, 2025 09:20

На социјалните мрежи објавени се и видеа од дел од апсењата на одредени локации во Белград, во кои се наведува дека луѓето биле тепани и уапсени. Министерството за внатрешни работи, пак, оценува дека е постапено високо професионално тврдејќи дека се приведени поради напад и навреда на полицијата и нарушување на јавниот ред и мир

Министерството за внатрешни работи на Србија соопшти дека се отстрануваат сите блокади на патиштата во Белград по синоќешниот протест. Дополнително, информираат дека од утринава повеќе лица се приведени поради напад на полицијата и нарушување на јавниот ред и мир.

Дел од блокадите во Белград / Фото: EPA/ANDREJ CUKIC

Во соопштението на српското МВР не се наведува бројот на приведени лица.

На социјалните мрежи објавени се и видеа од дел од апсењата на одредени локации во Белград, во кои се наведува дека луѓето биле тепани и уапсени.

Министерството за внатрешни работи, пак, оценува дека е постапено високо професионално, тврдејќи дека се приведени поради напад и навреда на полицијата и нарушување на јавниот ред и мир.

Вчера попладне на десетици локации низ Србија, вклучувајќи го и Белград, се одржаа блокади на кои демонстрантите поставија три барања до владата – распишување предвремени парламентарни избори, ослободување на сите приведени за време на инцидентите на студентскиот протест на 28 јуни, како и отстранување на кампот што беше поставен во центарот на Белград од противниците на студентските блокади.

Студентите повикаа блокадите да продолжат и денеска низ цела Србија. Заедно со повик за граѓанска непослушност, тие им порачаа на граѓаните да се оддалечат од блокадите мирно и без паника во случај полицијата да пристигне со опрема за разбивање на демонстрациите.

©2025 360 степени, Сите права се задржани