Нетанјаху се соочува со судење во три случаи на корупција, во кои е обвинет за примање мито, измама и злоупотреба на доверба
Окружниот суд во Ерусалим ја одби молбата на израелскиот премиер Бенјамин Нетанјаху за двонеделна пауза во судењето за корупција, откако Државното обвинителство се спротивстави на оваа иницијатива.
Во соопштението, судијката Ривка Фридман-Фелдман наведува дека барањето, поднесено од адвокатот на Нетанјаху, Амит Хадад, не обезбедува доволно детална основа или оправдување што би можеле да го оправдаат одложувањето на изведувањето докази.
Претходно, израелското обвинителство изрази противење на барањето на Нетанјаху за двонеделна пауза во неговото судење, наведувајќи дека бавното темпо на неговото сведочење и претстојниот летен одмор не се оправдани причини за прекин.
Адвокатот на премиерот, Амит Хадад, претходно изјави дека Нетанјаху бара пауза за да може да се посвети на дипломатски, национални и безбедносни прашања од прв ред, во услови на неодамнешната војна со Иран, која заврши во вторникот, пренесува „Тајмс оф Израел“.
Според адвокатот, овие прашања опфаќаат и управување со војната во Газа и решавање на прашањето со заложниците.
Како одговор, Обвинителството истакна дека општите причини наведени во барањето не можат да оправдаат откажување на две недели судење, особено пред претстојната сезона на одмори.
Обвинителството потсети дека веќе се направени измени за подобро усогласување со обврските на премиерот, вклучувајќи го и одобрението да сведочи два пати неделно наместо три пати.
Нетанјаху се соочува со судење во три случаи на корупција, во кои е обвинет за примање мито, измама и злоупотреба на доверба.
Тој ги негира сите обвиненија, тврдејќи дека тие се измислени како политички удар од страна на полицијата и државното обвинителство.