Како следен чекор, Украина планира да предложи самит на светските лидери за сериозен дијалог. Деталите за форматот и временската рамка на новите фази од преговорите се очекува да бидат објавени наскоро
Украинскиот министер за одбрана Рустем Умеров изјави дека Киев планира да предложи средба меѓу претседателот Володимир Зеленски и рускиот претседател Владимир Путин штом ќе завршат преговорите за хуманитарните прашања. Умеров ова го изјави на средба со новинарите, објави „Киев пост“.
„Украина отсекогаш била доследна во своите напори за постигнување мир. Ние ја поддржуваме американската иницијатива за целосен прекин на огнот од самиот почеток и ја докажавме нашата посветеност преку неколку рунди преговори. Но, секој дијалог мора да се води без ултиматуми и со целосно почитување на нашиот суверенитет“,
рече Умеров.
Првото јавно споменување на иницијативата за прекин на огнот дојде од американскиот претседател Доналд Трамп во јануари. Потоа преговорите се одвиваа во неколку фази и во неколку земји. Првата рунда се одржа во Џеда, Саудиска Арабија, каде што украинските претставници, заедно со нивните американски партнери, ги изложија принципите за евентуален прекин на огнот.
Втората рунда беше во Ријад, со понатамошни разговори меѓу Украина и САД, во кои Русија учествуваше преку видеоврска. Комуникацијата меѓу Киев и Москва се одвиваше индиректно, преку американски посредници.
Во март, САД официјално предложија целосно прекин на огнот на копно, море и воздух, на што Украина се согласи. Сепак, по повеќе од десет часа разговори, руската страна одби каков било компромис. Единствениот резултат беше привремен мораториум за напади врз енергетската инфраструктура, рече Умеров. На барање на Москва, разговорите подоцна продолжија во Турција, но без учество на САД.
Според Умеров, разговорите се фокусирале на три главни прашања: целосен прекин на огнот, хуманитарни мерки како што се размена на затвореници, ослободување на цивили и враќање деца, како и потенцијален самит на светските лидери – Зеленски, Путин и Трамп. Сепак, во последните две рунди не е постигнат договор за прекин на огнот бидејќи Русија продолжува да инсистира на ултиматуми што Украина ги смета за неприфатливи.
„Украина е подготвена за праведен мир, а не за прикриен одмор за нова агресија“,
нагласи Умеров.
Умеров рече дека Украина веќе три години спроведува структурирана програма за размена на затвореници и е доследна во однос на хуманитарните прашања. Тој, исто така, предупреди дека Русија може да ги користи овие прашања како средство за избегнување на растечкиот притисок од санкциите.
Како следен чекор, Украина планира да предложи самит на светските лидери за сериозен дијалог. Деталите за форматот и временската рамка на новите фази од преговорите се очекува да бидат објавени наскоро.