Алисон Бароуз, федерална судијка во Бостон, издаде привремена забрана со која го блокира најновиот обид за ограничување на можноста на „Харвард“ да прима меѓународни студенти
Федерална судијка вчера ја блокираше администрацијата на американскиот претседател Доналд Трамп да го спроведе неговиот план за забрана за влез на странски државјани во Соединетите Држави кои сакаат да студираат на универзитетот „Харвард“.
Алисон Бароуз, федерална судијка во Бостон, издаде привремена забрана со која го блокира најновиот обид за ограничување на можноста на „Харвард“ да прима меѓународни студенти.
Привремената забрана ја продолжува привремената наредба што таа ја издаде на 5 јуни, еден ден откако Трамп потпиша проглас за ова прашање поради загриженост за националната безбедност.
Трамп го стори тоа откако веќе замрзна милијарди долари финансирање за најстариот и најбогат универзитет во Америка, се закани дека ќе ги укине даночните ослободувања и започна неколку истраги за универзитетот.
Прогласот би им забранил на странските државјани да влегуваат во САД за да студираат на „Харвард“ или да учествуваат во програми за размена во почетен шестмесечен период, а државниот секретар Марко Рубио би морал да одлучи дали да ги поништи визите за меѓународните студенти кои веќе се запишани на „Харвард“.
Но, Бароуз рече дека администрацијата на Трамп веројатно ги крши правата на „Харвард“ за слобода на говорот од Првиот амандман со тоа што се одмаздува на универзитетот за тоа што одбива да ги исполни неговите барања да се откаже од контролата врз наставната програма на универзитетот и приемот на студенти, и го таргетира врз основа на она што официјалните лица го сметаат за левичарски ориентации на универзитетот.
Универзитетот „Харвард“ соопшти дека одлуката ќе им овозможи на меѓународните студенти и научници да продолжат да бидат примани додека трае случајот. Тие додадоа дека ќе продолжат да ги бранат правата на универзитетот, неговите студенти и научници. Речиси 6 800 меѓународни студенти студирале на „Харвард“ во последната академска година, што претставува околу 27 проценти од студентската популација.
Универзитетот поднесе две одделни тужби против Бароуз, барајќи да се деблокираат околу 2,5 милијарди долари финансирање и да се спречи блокирање на меѓународните студенти од студирањето на универзитетот.
Втората тужба беше поднесена откако министерката за внатрешна безбедност Кристи Ноем кон крајот на мај објави дека нејзиниот оддел веднаш ја повлекува сертификацијата за Програмата за студенти и посетители на размена на Харвард, која му овозможува да запишува странски студенти, обвинувајќи го универзитетот за поттикнување насилство, антисемитизам и координација со Комунистичката партија на Кина.
Застапниците за човекови права го истакнаа порастот на антисемитизмот и исламофобијата во САД поради војната во Газа, а администрацијата на Трамп сè уште не објави никаква акција против антиарапската и антимуслиманската омраза.