Уште еден послаб земјотрес е регистриран синоќа во Охридско-струшкиот регион

Според Сеизмолошката опсерваторија при Природноматематичкиот факултет во Скопје, потресот е почувствуван во Охрид, Струга и блиската околина со интензитет од IV степени според Европската макросеизмичка скала

Уште еден, послаб, земјотрес со јачина од 2,5 степени според Рихтеровата скала синоќа е почувствуван во Охридско-струшкиот регион, соопшти Сеизмолошката опсерваторија при Природноматематичкиот факултет во Скопје.

Потресот бил регистриран 48 минути по полноќ во епицентралното подрачје Пештани-Охрид-Струга, на околу 102 километри југозападно од Скопје.

Европско-медитеранскиот сеизмолошки центар (ЕМСЦ) известува дека земјотресот бил на длабочина од 15 километри.

Според Сеизмолошката опсерваторија при Природноматематичкиот факултет во Скопје потресот е почувствуван во Охрид, Струга и блиската околина со интензитет од IV степени според Европската макросеизмичка скала.

Серија земјотреси чии епицентри потекнуваат од епицентралното подрачје Пештани-Охрид-Струга, беа регистрирани и вчера рано наутро во Охридскиот регион. Најсилниот беше почувствуван во 4 часот и 34 минути во Охрид и блиската околина со интензитет од V степени според Европската макросеизмичка скала.  

Земјотрес со јачина од 3,8 степени почувствуван во Охрид и околината

Освен вознемиреност кај граѓаните, материјални штети не се пријавени.