Јованов е обвинет за кривичното дело тешки дела против безбедноста на луѓето и имотот во сообраќајот за кое е предвидена затворска казна до 20 години. Предметот ќе го води судијката Снежана Марковска
Денеска во Основниот кривичен суд Скопје треба да почне судскиот процес против Васил Јованов, кој е обвинет за прегазувањето на студентката Фросина Кулакова на пешачки премин во Скопје.
Васил Јованов е обвинет за кривичното дело тешки дела против безбедноста на луѓето и имотот во сообраќајот за кое е предвидена затворска казна до 20 години. Случајот ќе го води судијката Снежана Марковска.
Според обвинението, на 29 јануари 2025 година Васил Јованов, без возачка дозвола и под дејство на алкохол, управувал возило со брзина од 91 километар на час на булеварот „Партизански одреди“ во Скопје. На пешачки премин, на црвено светло, удрил во Фросина Кулакова, која поминувала на зелено светло за пешаци. Од силата на ударот, Фросина се здобила со тешки телесни повреди и починала на самото место.
Во меѓувреме, Основното јавно обвинителство Скопје поднесе обвинителен предлог и против таткото на Васил, Зоран Јованов, за кривично дело предизвикување општа опасност од член 288 став 4 во врска со став 1 од Кривичниот законик.
Според обвинението Зоран Јованов, во периодот од 4.11.2022 до 30.1.2025 година, му дозволувал на својот син Васил Јованов да управува патничко моторно возило „пежо 207“, иако знаел дека синот нема возачка дозвола и е повеќекратен сторител на сообраќајни деликти вклучително и сообраќајната несреќа во која животот го загуби 22-годишната Фросина Кулакова.