Папата Франциско почина вчера од мозочен удар и срцева слабост, соопшти Ватикан. Во тек се планови за неговото последно испраќање додека илјадници верници се собираат на плоштадот „Свети Петар“
Кардиналите денеска ќе се состанат во Ватикан, со цел да ги договорат деталите за погребот на папата Франциск, пренесува „Гардијан“. Ова е првата од серијата генерални собранија на кардиналите што ќе ги одржат по смртта на папата.
На состанокот кардиналите ќе одлучуваат за датумот на погребот на папата Франциск, со што започнува процес кој ќе кулминира со избор на нов католички водач.
Се очекува тие да донесат и одлука кога телото на папата ќе биде преместено во базиликата „Свети Петар“ пред погребот, за да може да му се оддаде почит на починатиот папа.
Според Ватикан, пренесувањето на телото на папата би можело да се изврши во среда наутро.
Погребот треба да се одржи помеѓу четвртиот и шестиот ден по смртта на папата, според апостолскиот устав.
Се очекува да присуствуваат шефови на држави и влади од целиот свет.
Иако се практикува починатите папи да се погребуваат во базиликата „Свети Петар“, се очекува тој да биде погребан во базиликата „Санта Марија Маџоре“, едно од неговите омилени места.
Папата, поглаварот на 1,4 милијарда католици во светот, почина вчера во својот дом во Ватикан на 88-годишна возраст откако претрпи мозочен удар. Тој заздравуваше од пневмонија поради која беше хоспитализиран пет недели.