„Она што е важно е дека судството треба да ги преземе сите активности, не само за овој посебен случај, туку за сите случаи на корупција со цел да може да се осигури дека судството ќе биде независно и дека ќе може да презема дејствија за да се справи со прашањата на корупција. Од наша страна ЕУ има направено многу напори да обезбеди различни механизми и да му помогне на судството да зајакне“, рече Рокас
Процесот на проширување е врвен приоритет на Европската Унија. Правиме напори да заврши процесот на реформи во Северна Македонија и што побргу да се постигне целта, земјата да стане членка на ЕУ, изјави денеска шефот на Делегацијата на ЕУ во земјава, Михалис Рокас.
Тој посочи дека во моментот во тек се повеќе дипломатски активности во врска со ова прашање.
„Во моментот во тек се многу дипломатски активности во врска со ова прашање. Премиерот на Северна Македонија беше во посета на Брисел каде што се сретна со новото раководство на ЕУ, а следната недела, на 18 декември, ќе има уште една можност да го посети Брисел, во рамките на Самитот на ЕУ и земјите од Западен Балкан. Јас мислам дека од страна на новото раководство на ЕУ е јасно кажано дека процесот на проширување е врвен приоритет, вклучително и со Северна Македонија. И Делегацијата на ЕУ прави огромни напори да заврши процесот на реформи за Северна Македонија и таа да стане членка на ЕУ. Каква било друга дополнителна поддршка или дипломатски активности е повеќе од добредојдена“,
рече Рокас одговарајќи на новинарско прашање, за време на неговата посета на Општина Тетово.
Во врска со ставањето на т.н. „црна листа“ на САД на поранешниот вицепремиер и функционер на ДУИ, Артан Груби и судијата во Апелацискиот суд Скопје, Енвер Беџети, поради вмешаност во значителна корупција, Рокас посочи дека судството треба да ги преземе сите активности за сите случаи на корупција.
„Она што е важно е дека судството треба да ги преземе сите активности, не само за овој посебен случај, туку за сите случаи на корупција се со цел да може да се осигура дека судството ќе биде независно и дека ќе може да презема дејствија за да се справи со прашањата на корупција. Од наша страна ЕУ има направено многу напори да обезбеди различни механизми и да му помогне на судството да зајакне, тука ги имаме механизмите на т.н. Оценска мисија на ЕУ која што издаде 40 препораки за судството во Северна Македонија. Мислам дека тоа што е најважно е судството да стане независно бидејќи тоа е клучно за идниот интегративен процес на вашата земја во ЕУ“,
нагласи Рокас.
Прашан за претресите кои се случуваат во Судскиот совет, Рокас рече дека Јавното обвинителство треба да ги направи сите можни пребарувања во случаи кога постојат сомнежи за постоење на корупција во одредена институција.
„Мислам дека канцеларијата на Јавното обвинителство секогаш треба да ја има можноста да ги направи сите можни пребарувања во случаи кога постојат сомнежи за постоење на корупција во одредена институција. Без разлика дали станува збор за индивидуални или општи акти, во едно демократско општество на Јавното обвинителство треба да му бидат ставени на располагање сите механизми за да може да изврши истрага за можна корупција“,
додаде шефот на Делегацијата на ЕУ во земјава.