Покрај заплената, како што информираат од МВР, поднесени се кривични пријави против фирмата, како правно лице, актуелниот и поранешниот управител, како и против уште три лица
Околу четири тони марихуана запленила полицијата од фирма во валандовското село Јосифово која имала лиценца за производство на канабис за медицински цели, соопшти утрово Министерството за внатрешни работи (МВР).
Марихуаната е заплената откако при контрола од страна на надлежните институции било утврдено дека фирмата не ги почитувала стандардите за производство пропишани со Законот за контрола на опојни дроги и психотропни супстанции, односно наместо сув цвет на канабис пакувала гранки, листови и биомаса со многу мала франкција на суви иситнети цветови.
Покрај заплената, како што информираат од МВР, поднесени се кривични пријави против фирмата, како правно лице, актуелниот и поранешниот управител, како и против уште три лица.
Случајот бил откриен кога при крајот на октомври и почетокот на ноември годинава, комисија на Министерството за здравство, по барање на МВР и во присуство на службеници од Одделот за криминалистичка полиција и од Одделението за внатрешни работи во Валандово, извршиле контрола во фирмата која имала лиценца за одгледување марихуана за медицински цели.
„Во текот на контролата се утврдени многубројни неправилности поврзани со произведената марихуана за медицински цели, при што е известен надлежен јавен обвинител од Основното јавно обвинителство Гевгелија, кој дал наредба да биде извршен претрес во правното лице, по претходно издадена наредба од судија на претходна постапка од Основен кривичен суд Гевгелија и комисијата при Министерството за здравство за исполнетост на условите за простор, опрема и кадар за добивање на одобрение за производство на марихуана за медицински цели“,
велат од МВР.
Претресот бил извршен, при што надлежните утврдиле дека содржината спакувана во 500 кутии со вкупна маса од околу 1 390 килограми не одговара на декларациите за присуство на сув цвет на марихуана залепени на секоја од нив.
По ова следувала наредба од надлежниот јавен обвинител за вештачење на содржината од кутиите што ја извршил Фармацевтскиот факултет при Универзитетот „Св. Кирил и Методиј“. Вештачењето, како што информираат од МВР, утврдило дека содржината во пакувањата е фалсификувана, односно наместо сув цвет на марихуана содржи отпад, гранки, листови, биомаса и многу мала фракција на суви мали иситнети цветови, наоди кои укажуваат на извршено кривично дело по член 95 в и член 29 г од Законот за контрола на опојни дроги и психотропни суптанции.
Валандовската полиција и Одделот за криминалистичка полиција извршиле дополнителни проверки, а на службен разговор биле повикани 16 лица, меѓу кои сопствениците на фирмата, поранешен управител, лица од обезбедувањето и работници кои биле ангажирани на тримирање и чистење на марихуаната.
„Утврдено е дека околу 1390 килограми на марихуана е фалсификувана, а исто така утврдено е дека биомаса со ТХЦ (активната супстанција во растението канабис сатива) со вкупна маса од 1 629 килограми, која правното лице било задолжено да ја уништи и да достави известување до Министерството за здравство, не ја уништило и при контролата е затекната во правното лице“,
велат од МВР.
Исто така, било утврдено дека недостасуваат околу 11 килограми марихуана од сортата булк глубери, за кои не бил доставен доказ каде се наоѓа.
Дополнително, при контролата и претресот, надлежните утврдиле дека околу 815 килограми марихуана од реколтата од 2023 година била спакувана во полиетиленски (најлонски вреќи) наместо во картонски кутии, како што налага законот.
Откако полицијата ги обезбедила сите материјални докази, велат од МВР, валандовската полиција до ОЈО Гевгелија поднела кривична пријава за извршено кривично дело по член 95 в, 29 г од Закон за контрола на опојни дроги против управителот на правното лице У.Р.Г. (21) од Бугарија, поранешниот управител Љ.С. (35) од Ново Село, против правното лице како и против Б.И. (49) од Нов Дојран, Б.И. (25) од Струмица и Н.Г. (40) од Струмица.
Од страна на јавен обвинител од ОЈО Гевгелија била издадена наредба за одземање на околу 1 390 килограми фалсификувана марихуана, околу 1630 килограми биомаса со ТХЦ и околу 815 килограми марихуана со ТХЦ.
„Исто така, од извршениот претрес и контрола утврдено е дека во правното лице пријавените управители пријавувале помала количина на сув цвет од реалната и констатирани се вишоци на марихуана“,
додаваат од МВР.
Во меѓувреме, од страна на комисијата при Министерството за здравство е изготвено решение за одземање на лиценцата за производство на марихуана за медицински цели на фирмата.