Детето што падна од зграда во Кисела Вода е во стабилна состојба, но со повреди на повеќе органи, вели директорот на Детската хирургија

„Има повреди и скршеници на повеќе системи и органи, почнувајќи од главата, рамото, повреди на белите дробови, фрактури на ребрата и карлицата. Дише самостојно, со кислородна поддршка и засега нема индикации дека е потребен оперативен зафат“, вели д-р Јовчески

Детето што вчеравечер падна од прозорец на зграда во Кисела Вода е во стабилна состојба, но има повреди на повеќе органи, информира за ТВ Телма в.д. директорот на Клиниката за детска хирургија, д-р Лазо Јовчески, посочувајќи дека тоа е под постојана опсервација.

„Детето се наоѓа на интензивната нега на Клиниката за детската хирургија. Тоа е во стабилна општа состојба, но со стабилни витални параметри. Има повреди и скршеници на повеќе системи и органи, почнувајќи од главата, рамото, повреди на белите дробови, фрактури на ребрата и карлицата. Дише самостојно, со кислородна поддршка и засега нема индикации дека е потребен оперативен зафат“,

вели д-р Јовчески.

Посочи дека во моментот не може да каже дали пациентот е надвор од животна опасност, зашто се претпазливи и оти се работи за повреди на повеќе системи и органи.

„Постапуваме според наодите и виталните параметри што се следат“,

кажа директорот на клиниката.

Шеесет и деветгодишна жена починала, а деветгодишно дете е повредено по пад од зграда во Кисела Вода

Од Министерството за внатрешни работи (МВР) денеска информираа дека шеесет и деветгодишна жена починала, а деветгодишно дете е повредено откако вчера паднале од зграда во скопската населба Кисела Вода.

Настанот, како што додаваат од МВР, се случил вчера во 19:40 часот. Жената починала на самото место, а малолетникот веднаш бил пренесен во комплексот клиники „Мајка Тереза“.

Засега нема детали за причините на несреќата.