Предлогот за отворање на угостителските објекти е да бидат отворени само терасите, и тоа на десет квадратни метри да има само една маса со четири гости, соопшти денеска министерот за економија Крешник Бектеши, кој смета дека тоа би било економски неисплатливо за дел од угостителските објекти.
Тој рече дека има поразличен став за отворањето од предлозите на Комисијата за заразни болести, но оти како Влада ќе ја почитуваат одлуката бидејќи оваа комисија е најповикана за тоа како треба да се штити јавното здравје.
„Како влада немаме донесено одлука за денот кога ќе се отворат угостителските објекти и начинот како ќе бидат отворени. Имаме предлози од Комисијата за заразни болести кои во текот на оваа недела ќе се разгледаат и ќе се донесат соодветни одлуки. Јас и претходно кажав дека лично имам поразличен став од она што е предложено, но секако како Влада ќе ја поддржиме одлуката на Комисијата за заразни болести бидејќи таа е најповикана како треба да се штити здравјето на сите граѓани“,
рече денеска Бектеши.