На средбата, како што соопштија од ВМРО-ДПМНЕ, било истакнато оти е потребно задржување на програмските определби кои добиле поддршка од граѓаните на изборите
Работните групи на ВМРО-ДПМНЕ и коалицијата „Вреди“, кои преговараат за нивното евентуално коалицирање во идната влада, денеска ја одржаа првата средба. По состанокот, кој се одржа во седиштето на ВМРО-ДПМНЕ, од партијата на Христијан Мицкоски соопштија оти разговорите во позитивен дух ќе продолжат и натаму.
На средбата, како што се наведува во соопштението на ВМРО-ДПМНЕ, било истакнато оти е потребно задржување на програмските определби кои добиле поддршка од граѓаните на изборите.
„При таквото раководење на идниот владин состав да се запазат договорените принципи на делување, силно динамизирање на евроинтеграциите, бескрупулозна борба против корупцијата и криминалот и економски реформи за повисок животен стандард“,
пишуваат од ВМРО-ДПМНЕ во соопштението испратено до медиумите по состанокот на работните групи.
На денешната средба, како што пред нејзиниот почеток изјави членот на работната група од крилото на Таравари од Алијанса на Албанците, Азир Алиу, ќе се разговара за методологијата и динамиката на работа на овие групи. Поконкретни разговори на кои ќе биде начната и темата за кадровски решенија, најверојатно ќе се отворат на наредниот состанок, изјави Алиу одговарајќи на новинарски прашања.
- Работните групи на ВМРО-ДПМНЕ и „Вреди“ на прва средба од разговорите за формирање владина коалиција
Раководството на ВМРО-ДПМНЕ и лидерите на партиите од коалицијата „Вреди“ во саботата одржаа состанок на кој се договорија натамошните разговори за формирање на евентуална владина коалиција да се водат на ниво на работни групи сè до нивното финализирање.
На средбата пред пет дена, како што соопштија тогаш од ВМРО-ДПМНЕ, биле договорени општите начела за соработка за идната влада, која ќе се базира на три постулати – евроинтеграции, забрзан економски развој, како и борба против криминалот и корупцијата и владеење на правото.