„Европскиот фронт“ ќе ги обжали одлуките за приговорите за ИЕ 5 и 6 – на членовите на ДИК им бил вршен политички притисок

„Нагласуваме дека овие дејствија претставуваат кривични дела и ќе ги преземеме сите неопходни мерки и ќе ги искористиме сите демократски форми за заштита на слободниот глас на граѓаните. Во таа насока, известуваме дека веднаш по донесувањето на одлуката ќе ја обжалиме и до Управниот суд“, Елми Азири од коалицијата

Коалицијата „Европски фронт“ ќе ги обжали донесените одлуки на Државната изборна комисија (ДИК) до Управниот суд за приговорите што се однесуваат на петтата и шестата изборна единица.

Ваквата информација денеска на прес-конференција ја пренел Елми Азири од „Европскиот фронт“ посочувајќи дека веќе ги алармирале сите надлежни институции и меѓународниот фактор бидејќи, како што рече, имаат точни информации дека во петокот на членовите на ДИК им бил извршен политички притисок преку партиски инструкции.

„Нагласуваме дека овие дејствија претставуваат кривични дела и ќе ги преземеме сите неопходни мерки и ќе ги искористи сите демократски форми за заштита на слободниот глас на граѓаните. Во таа насока, известуваме дека веднаш по донесувањето на одлуката ќе ја обжалиме и до Управниот суд“,

рече тој.

Според него, донесената одлука за прегласување на некои избирачки места во петтата и шестата изборна единица е неправедно и со надгласување како во времето на едноумието.

Аризи рече и дека „Европскиот фронт“ апелира до институциите да постапат според законот без да прифатат притисоци од политичките партии.

Ја повикуваат меѓународната заедница будно да ја следи ситуацијата затоа што, како што рече Азири, повторно се инсталира заробената држава, надгласувањето и етничката мајоризација. 

Коалиција „Вреди“: Во Липково и Леарце „Европскиот фронт“ правел бугарски воз, во четири гласачки кутии откриени неправилности и кражба на гласови

Два од усвоените приговори за избирачкото место 1844 во Струга, во рамки на петтата изборна единица, се поднесени од „Коалицијата за европска иднина“ на СДСМ и од коалицијата „Твоја Македонија“ предводена од ВМРО-ДПМНЕ. Преостанатите два приговора прифатени од ДИК се, исто така, поднесени од ВМРО-ДПМНЕ и се однесуваат на две избирачки места во Долнени – 1470 и 1470/1 – во истата изборна единица.

ДИК претходно прифати три приговори од коалицијата на ВМРО-ДПМНЕ и еден од коалицијата „Вреди“ – два од нив во петтата и еден во шестата изборна единица. Прифатени се приговори за избирачки места во Охрид, Крушево и Желино.

ДИК прифати уште три приговори за резултатите од парламентарните избори, два се од СДСМ и ВМРО-ДПМНЕ за исто избирачко место

До ДИК вкупно се поднесени 27 приговори од политичките партии, девет од коалицијата „Вреди“, осум од ВМРО-ДПМНЕ, пет од СДСМ и четири од Левица.