Портпаролот на СДСМ, Костадин Костадинов, вели дека ВМРО-ДПМНЕ во јавноста споделува различни ставови во врска со прогласувањето на вонредната состојба. Тој вели дека за ставовите на лидерот на ВМРО-ДПМНЕ, Христијан Мицкоски, и потпретседателот на партијата Александар Николоски, се сосема различни по ова прашање.
„Прво Мицкоски, на 24 април изјави дека не му се јасни вторите 30 дена вонредна состојба и дека првите 30 денови ’биле сосема доволни‘. Вчера, неговиот потпретседател, Александар Николовски, изјави дека ’вонредната состојба треба да продолжи‘, па дури и додаде дека тоа ’не е прашање на нечија желба‘. Пред 1 недела Мицкоски вели едно, вчера Николовски вели друго. Каква неодговорност и несериозност. Во ВМРО-ДПМНЕ немаат став за ниту едно важно прашање“,
рече Костадинов на денешната прес-конференција.
Според него, ВМРО-ДПМНЕ од почетокот на кризата тргнале со потценување и исмевање на заканите по здравјето на граѓаните.
„Длабоко врежана во меморијата на граѓаните останува онаа срамна изјава на Мицкоски на крајот од февруари дека ’од СДСМ молеа бога да се случи корона вирус за да не може ВМРО-ДПМНЕ да излегува со народот на протести‘. Секојдневни се и обидите за девалвирање на успешното справување со пандемијата со коронавирусот од страна на здравствените власти. Наместо поддршка на напорите на Венко Филипче и неговиот тим, тие во екот на кризата водат негативна кампања против министерот за здравство со ширење лажни вести и невистини. Како примерот со Мицкоски кој излажа дека немало ниту 100 тестови во државата а илјадници се тестираа“,
вели Костадинов.