Судии преку писмо реагираат дека одлуката на Владата со уредба да ги стави на минимална плата поради кризата со коронавирусот е незаконска и противуставна.
Писмото кое е упатено до Здружението на судии го објави „Фокус“ и во него тие потенцираат дека според Законот за плати на судии, платата не може да биде намалена со закон или со одлука на државен орган.
Тие се повикуваат и на Уставот, при што еден од членовите кој го потенцираат е 98, во кој се гарантира самостојноста и независноста на судската власт.
„Со Уредбата се доведува во прашање уставно востановениот систем на поделба на власта, на владеењето на правото и претставува директна интервенција на извршната во судската власт, со што се доведува во прашање и уставно загарантираната самостојност и независност на судството. Исто така, се доведуваат во прашање и повеќе загарантирани основни човекови права со ЕКЧП и чл. 1 од Протокол 1“,
пишува во писмото за кое не е наведено кои и колку судии стојат зад него.
Во писмото се наведува и дека судиите се подготвени доброволно да одвојат дел од своите плати, но не се согласуваат со присилна интервенција.
До објавувањето на овој текст не успеавме да стапиме во контакт со Здружението на судии и со претседателот на ова тело, Џемаили Саити.
Уредбата со законска сила со која на судиите и обвинителите им се определува минимална плата за април и мај беше објавена во „Службен весник“ број 97, од 9 април 2020 година, а е донесена на седница на Владата на 7 април.
„Одредбите од оваа уредба со законска сила се однесуваат и на избраните судии кои остваруваат право на плата согласно Законот за платите на судиите и на јавните обвинители кои остваруваат право на плата согласно Законот за платите на јавните обвинители“,
пишува во член 2 од Уредбата.
Редовните месечни примања на судиите се движат од 55 000 денари за оние во основните до 85 000 денари за врховните судии, а со уредбата тие се ставаат на минималец од 14 500.